1
1	בִּשְׁנַ֤ת שְׁתַּ֙יִם֙ לְדָרְיָ֣וֶשׁ הַמֶּ֔לֶךְ בַּחֹ֙דֶשׁ֙ הַשִּׁשִּׁ֔י בְּי֥וֹם אֶחָ֖ד לַחֹ֑דֶשׁ הָיָ֨ה דְבַר־ יְהוָ֜ה בְּיַד־ חַגַּ֣י הַנָּבִ֗יא אֶל־ זְרֻבָּבֶ֤ל בֶּן־ שְׁאַלְתִּיאֵל֙ פַּחַ֣ת יְהוּדָ֔ה וְאֶל־ יְהוֹשֻׁ֧עַ בֶּן־ יְהוֹצָדָ֛ק הַכֹּהֵ֥ן הַגָּד֖וֹל לֵאמֹֽר׃
	(4Q77 frg. 3,6) [בשנת] שתים לדריהש המלך֯[ בחדש הששי ביום אחד לחדש] (4Q77 frg. 3,7) [היה ]דבר יהוה ביד ח֯גי֯[ הנביא אל זרבבל בן שאלתיאל] (4Q77 frg. 3,8) [פח]ת֯ יהודה ואל יהוש[ע בן יהוצדק הכהן הגדול לאמר ] (Mur. 88 21,23) ב֯שנ֯[ת שתי]ם לדריוש המל[ך ב]ח֯ד֯ש ה[ש]ש֯י֯ ב֯י֯[ו]ם֯ אחד֯ [לח]ד֯ש ה[יה] (Mur. 88 21,24) דבר֯ [י]ה[וה] ביד֯ חג֯[י] ה֯נביא [אל] ז֯ר֯ב֯ב֯ל֯ [בן שא]לתיאל פח[ת יה]וד֯ה [ו]אל֯ (Mur. 88 21,25) [יהושע] ב֯ן יהוצ[דק ה]כ֯הן֯ הגד[ו]ל לאמ֯ר֯
2	כֹּ֥ה אָמַ֛ר יְהוָ֥ה צְבָא֖וֹת לֵאמֹ֑ר הָעָ֤ם הַזֶּה֙ אָֽמְר֔וּ לֹ֥א עֶת־ בֹּ֛א עֶת־ בֵּ֥ית יְהוָ֖ה לְהִבָּנֽוֹת׃ פ
	(4Q77 frg. 3,9) [כה ]אמר יהוה צב[אות לאמר העם הזה אמרו לא עת בא] (Mur. 88 21,25) [כה] א֯מ֯ר֯ יהוה צבא֯ו֯ת֯ ל֯א[מר] (Mur. 88 21,26) ה֯[עם] ה֯ז֯ה א֯[מרו לא] עת֯ ב[א עת בית יהוה להבנות ]
3	וַֽיְהִי֙ דְּבַר־ יְהוָ֔ה בְּיַד־ חַגַּ֥י הַנָּבִ֖יא לֵאמֹֽר׃
	(Mur. 88 21,28) [וי]הי [דבר] יהוה ביד חגי ה[נ]ביא לא[מר
4	הַעֵ֤ת לָכֶם֙ אַתֶּ֔ם לָשֶׁ֖בֶת בְּבָתֵּיכֶ֣ם סְפוּנִ֑ים וְהַבַּ֥יִת הַזֶּ֖ה חָרֵֽב׃
	(Mur. 88 21,28) העת לכם אתם לשבת בבתיכם] (Mur. 88 21,29) ספונ[י]ם ו֯הבית הזה ח֯רב
5	וְעַתָּ֕ה כֹּ֥ה אָמַ֖ר יְהוָ֣ה צְבָא֑וֹת שִׂ֥ימוּ לְבַבְכֶ֖ם עַל־ דַּרְכֵיכֶֽם׃
	(Mur. 88 21,29) ועתה כה֯ א֯מ֯[ר] יהוה צב[אות שימו] (Mur. 88 21,30) לבבכ֯ם ע[ל] ד֯ר֯כיכ֯ם
6	זְרַעְתֶּ֨ם הַרְבֵּ֜ה וְהָבֵ֣א מְעָ֗ט אָכ֤וֹל וְאֵין־ לְשָׂבְעָה֙ שָׁת֣וֹ וְאֵין־ לְשָׁכְרָ֔ה לָב֖וֹשׁ וְאֵין־ לְחֹ֣ם ל֑וֹ וְהַ֨מִּשְׂתַּכֵּ֔ר מִשְׂתַּכֵּ֖ר אֶל־ צְר֥וֹר נָקֽוּב׃ פ
	(Mur. 88 21,30) זרעתם הרב֯ה [וה]ב֯[א] מ֯עט א֯[כול ואין לשבעה] (Mur. 88 21,31) ש֯ת֯ו֯ [ואי]ן֯ לש[כ]ר֯ה לבוש ואין לחם לו֯ [ו]ה֯משתכר֯[ משתכר אל] (Mur. 88 21,32) צרור נק֯[ו]ב
7	כֹּ֥ה אָמַ֖ר יְהוָ֣ה צְבָא֑וֹת שִׂ֥ימוּ לְבַבְכֶ֖ם עַל־ דַּרְכֵיכֶֽם׃
	(Mur. 88 21,33) כה [א]מ֯ר֯ י֯ה֯ו֯ה צ֯ב֯א֯[ות] ש֯ימו [לב]בכ֯ם֯ על [דרכיכם
8	עֲל֥וּ הָהָ֛ר וַהֲבֵאתֶ֥ם עֵ֖ץ וּבְנ֣וּ הַבָּ֑יִת וְאֶרְצֶה־ בּ֥וֹ ואכבד (וְאֶכָּבְדָ֖ה) אָמַ֥ר יְהוָֽה׃
	(Mur. 88 21,33) עלו ההר] (Mur. 88 21,34) ו֯הבאת֯[ם] עץ֯ ובנו הבית ו֯א֯[רצ]ה֯ בו וא֯[כבד אמר יהוה
9	פָּנֹ֤ה אֶל־ הַרְבֵּה֙ וְהִנֵּ֣ה לִמְעָ֔ט וַהֲבֵאתֶ֥ם הַבַּ֖יִת וְנָפַ֣חְתִּי ב֑וֹ יַ֣עַן מֶ֗ה נְאֻם֙ יְהוָ֣ה צְבָא֔וֹת יַ֗עַן בֵּיתִי֙ אֲשֶׁר־ ה֣וּא חָרֵ֔ב וְאַתֶּ֥ם רָצִ֖ים אִ֥ישׁ לְבֵיתֽוֹ׃
	(Mur. 88 21,34) פנה] (Mur. 88 21,35) אל הרבה והנה למע֯[ט והב]א֯ת֯ם ה֯[בית ונפחתי בו יען מה] (Mur. 88 21,36) [נ]א֯ם יהוה צבאות י[ען בי]ת֯י א֯שר[ הוא חרב ואתם רצים] (Mur. 88 21,37) [אי]ש֯ לב[י]ת֯ו
10	עַל־ כֵּ֣ן עֲלֵיכֶ֔ם כָּלְא֥וּ שָמַ֖יִם מִטָּ֑ל וְהָאָ֖רֶץ כָּלְאָ֥ה יְבוּלָֽהּ׃
	(Mur. 88 21,37) על כן ע֯ליכ֯ם֯ כ֯ל֯א[ו שמים מטל והארץ] (Mur. 88 21,38) [כלאה יבו]לה
11	וָאֶקְרָ֨א חֹ֜רֶב עַל־ הָאָ֣רֶץ וְעַל־ הֶהָרִ֗ים וְעַל־ הַדָּגָן֙ וְעַל־ הַתִּיר֣וֹשׁ וְעַל־ הַיִּצְהָ֔ר וְעַ֛ל אֲשֶׁ֥ר תּוֹצִ֖יא הָאֲדָמָ֑ה וְעַל־ הָֽאָדָם֙ וְעַל־ הַבְּהֵמָ֔ה וְעַ֖ל כָּל־ יְגִ֥יעַ כַּפָּֽיִם׃ ס
	(Mur. 88 21,38) וא֯[קר]א֯ חר֯ב[ על הארץ ועל ההרים] (Mur. 88 21,39) [ועל הדגן ועל התירוש וע]ל[ היצהר ועל אשר תוציא האדמה]
12	וַיִּשְׁמַ֣ע זְרֻבָּבֶ֣ל ׀ בֶּֽן־ שַׁלְתִּיאֵ֡ל וִיהוֹשֻׁ֣עַ בֶּן־ יְהוֹצָדָק֩ הַכֹּהֵ֨ן הַגָּד֜וֹל וְכֹ֣ל ׀ שְׁאֵרִ֣ית הָעָ֗ם בְּקוֹל֙ יְהוָ֣ה אֱלֹֽהֵיהֶ֔ם וְעַל־ דִּבְרֵי֙ חַגַּ֣י הַנָּבִ֔יא כַּאֲשֶׁ֥ר שְׁלָח֖וֹ יְהוָ֣ה אֱלֹהֵיהֶ֑ם וַיִּֽירְא֥וּ הָעָ֖ם מִפְּנֵ֥י יְהוָֽה׃
	(Mur. 88 22,1) ו[י]שמע ז[רבבל] בן שא֯[לתיאל ויהושע בן יהוצדק] (Mur. 88 22,2) ה[כ]הן הגדול [ו]כל ש֯[ארית העם בקול יהוה] (Mur. 88 22,3) אלהיהם [ו]ע֯ל דברי חג֯[י הנביא כאשר] (Mur. 88 22,4) [של]ח֯ו֯ [יה]וה [אל]ה[י]ה֯ם וי֯י֯ר֯א[ו העם מפני] (Mur. 88 22,5) [יהו]ה֯
13	וַ֠יֹּאמֶר חַגַּ֞י מַלְאַ֧ךְ יְהוָ֛ה בְּמַלְאֲכ֥וּת יְהוָ֖ה לָעָ֣ם לֵאמֹ֑ר אֲנִ֥י אִתְּכֶ֖ם נְאֻם־ יְהוָֽה׃
	(Mur. 88 22,5) וי[א]מר֯ חג֯[י מלאך יהוה במלאכו]ת (Mur. 88 22,6) [יה]ו֯ה֯ לעם [ל]אמר א֯ני[ אתכם נא]ם יה֯ו֯ה֯
14	וַיָּ֣עַר יְהוָ֡ה אֶת־ רוּחַ֩ זְרֻבָּבֶ֨ל בֶּן־ שַׁלְתִּיאֵ֜ל פַּחַ֣ת יְהוּדָ֗ה וְאֶת־ ר֙וּחַ֙ יְהוֹשֻׁ֤עַ בֶּן־ יְהוֹצָדָק֙ הַכֹּהֵ֣ן הַגָּד֔וֹל וְֽאֶת־ ר֔וּחַ כֹּ֖ל שְׁאֵרִ֣ית הָעָ֑ם וַיָּבֹ֙אוּ֙ וַיַּעֲשׂ֣וּ מְלָאכָ֔ה בְּבֵית־ יְהוָ֥ה צְבָא֖וֹת אֱלֹהֵיהֶֽם׃ פ
	(Mur. 88 22,7) [וי]ער֯ יהוה את רוח זרבב[ל בן שאלתי]אל פ֯ח֯ת֯ (Mur. 88 22,8) [יהודה ו]א֯ת רוח יהושע֯ בן יה֯[וצדק הכהן הגדול] (Mur. 88 22,9) ואת[ רוח כ]ל שאר֯ית֯ העם֯[ ויבאו ויעשו] (Mur. 88 22,10) [מלאכה בב]י֯ת יה֯[וה] צב֯[או]ת֯ [אלהי]הם
15	בְּי֨וֹם עֶשְׂרִ֧ים וְאַרְבָּעָ֛ה לַחֹ֖דֶשׁ בַּשִּׁשִּׁ֑י בִּשְׁנַ֥ת שְׁתַּ֖יִם לְדָרְיָ֥וֶשׁ הַמֶּֽלֶךְ׃
	(Mur. 88 22,11) ביום עשר]ים (Mur. 88 22,13) וארבע[ה לחדש בששי ב]שנת (Mur. 88 22,14) שתים לד֯[רי]וש ה֯[מ]לך

2
1	בַּשְּׁבִיעִ֕י בְּעֶשְׂרִ֥ים וְאֶחָ֖ד לַחֹ֑דֶשׁ הָיָה֙ דְּבַר־ יְהוָ֔ה בְּיַד־ חַגַּ֥י הַנָּבִ֖יא לֵאמֹֽר׃
	(Mur. 88 22,14) ב[שביעי] בע[ש]רים (Mur. 88 22,15) ואחד לחד֯ש [הי]ה ד֯[בר] יהוה אל חגי הנביא (Mur. 88 22,16) לאמר
2	אֱמָר־ נָ֗א אֶל־ זְרֻבָּבֶ֤ל בֶּן־ שַׁלְתִּיאֵל֙ פַּחַ֣ת יְהוּדָ֔ה וְאֶל־ יְהוֹשֻׁ֥עַ בֶּן־ יְהוֹצָדָ֖ק הַכֹּהֵ֣ן הַגָּד֑וֹל וְאֶל־ שְׁאֵרִ֥ית הָעָ֖ם לֵאמֹֽר׃
	(4Q77 frg. 4-5,1) [ואל יהושע בן] יהוצד֯ק֯[ הכהן] הגדו֯[ל ואל שארית העם לאמר (Mur. 88 22,16) אמר נא אל זרבבל בן ש[א]ל[תיא]ל פ֯ח[ת] (Mur. 88 22,17) יהודה[ ואל יהושע בן יהוצד]ק הכהן הגדול (Mur. 88 22,18) ו֯אל שארית העם לא֯מ֯[ר
3	מִ֤י בָכֶם֙ הַנִּשְׁאָ֔ר אֲשֶׁ֤ר רָאָה֙ אֶת־ הַבַּ֣יִת הַזֶּ֔ה בִּכְבוֹד֖וֹ הָרִאשׁ֑וֹן וּמָ֨ה אַתֶּ֜ם רֹאִ֤ים אֹתוֹ֙ עַ֔תָּה הֲל֥וֹא כָמֹ֛הוּ כְּאַ֖יִן בְּעֵינֵיכֶֽם׃
	(4Q77 frg. 4-5,1) מי בכם] (4Q77 frg. 4-5,2) [הנשאר אשר ראה א]ת֯ הבית ה֯[זה בכבו]דו הר[אשון ומה אתם ראים אתו עתה] (4Q77 frg. 4-5,3) [הלוא כמהו כאין בעי]נ֯י֯כם (Mur. 88 22,18) מי ]בכם ה֯נשאר (Mur. 88 22,19) אשר רא֯ה [א]ת הבית ה[זה בכבודו ה]ראשון (Mur. 88 22,20) ומה֯ אתם֯[ ראים] אתו [ע]ת[ה הלוא כמהו ]כא֯[י]ן (Mur. 88 22,21) בע[יני]כם
4	וְעַתָּ֣ה חֲזַ֣ק זְרֻבָּבֶ֣ל ׀ נְאֻם־ יְהוָ֡ה וַחֲזַ֣ק יְהוֹשֻׁ֣עַ בֶּן־ יְהוֹצָדָק֩ הַכֹּהֵ֨ן הַגָּד֜וֹל וַחֲזַ֨ק כָּל־ עַ֥ם הָאָ֛רֶץ נְאֻם־ יְהוָ֖ה וַֽעֲשׂ֑וּ כִּֽי־ אֲנִ֣י אִתְּכֶ֔ם נְאֻ֖ם יְהוָ֥ה צְבָאֽוֹת׃
	(4Q77 frg. 4-5,3) [ועתה חזק ]ז֯רבב֯[ל נאם יהוה וחזק יהושע] (Mur. 88 22,21) [ו]ע֯תה[ חזק זרבבל נאם יהוה] (Mur. 88 22,22) וחזק [יהו]שע בן[ יהוצדק הכהן הגדול] (Mur. 88 22,23) [ו]ח֯זק [כ]ל [ה]עם [הארץ נאם יהוה ועשו] (Mur. 88 22,24) כי א֯[ני] אתכם [נאם יהו]ה צבאות
5	אֶֽת־ הַדָּבָ֞ר אֲשֶׁר־ כָּרַ֤תִּי אִתְּכֶם֙ בְּצֵאתְכֶ֣ם מִמִּצְרַ֔יִם וְרוּחִ֖י עֹמֶ֣דֶת בְּתוֹכְכֶ֑ם אַל־ תִּירָֽאוּ׃ ס
	(Mur. 88 22,25) [את הדבר אשר כרתי אתכם ב]צ֯א֯תכם (Mur. 88 22,26) [ממצרים ורוחי עמדת בתוככם אל תיר]א֯ו
6	כִּ֣י כֹ֤ה אָמַר֙ יְהוָ֣ה צְבָא֔וֹת ע֥וֹד אַחַ֖ת מְעַ֣ט הִ֑יא וַאֲנִ֗י מַרְעִישׁ֙ אֶת־ הַשָּׁמַ֣יִם וְאֶת־ הָאָ֔רֶץ וְאֶת־ הַיָּ֖ם וְאֶת־ הֶחָרָבָֽה׃
	(Mur. 88 22,28) [כי כה אמר יהוה צבאות עוד אחת מע]ט֯ היא (Mur. 88 22,29) [ואני מרעיש את השמים ואת הארץ וא]ת֯ (Mur. 88 22,30) [הים ואת החרבה
7	וְהִרְעַשְׁתִּי֙ אֶת־ כָּל־ הַגּוֹיִ֔ם וּבָ֖אוּ חֶמְדַּ֣ת כָּל־ הַגּוֹיִ֑ם וּמִלֵּאתִ֞י אֶת־ הַבַּ֤יִת הַזֶּה֙ כָּב֔וֹד אָמַ֖ר יְהוָ֥ה צְבָאֽוֹת׃
	(Mur. 88 22,30) והרעשתי את כל הגוי]ם (Mur. 88 22,31) [ובאו חמדת כל הגוים ומלאתי את הבי]ת֯ (Mur. 88 22,32) [הזה כבוד אמר יהוה צבאות
8	לִ֥י הַכֶּ֖סֶף וְלִ֣י הַזָּהָ֑ב נְאֻ֖ם יְהוָ֥ה צְבָאֽוֹת׃
	(Mur. 88 22,32) לי הכסף ו]לי (Mur. 88 22,33) [הזהב נאם יהוה צבאות ]
9	גָּד֣וֹל יִֽהְיֶ֡ה כְּבוֹד֩ הַבַּ֨יִת הַזֶּ֤ה הָאַֽחֲרוֹן֙ מִן־ הָ֣רִאשׁ֔וֹן אָמַ֖ר יְהוָ֣ה צְבָא֑וֹת וּבַמָּק֤וֹם הַזֶּה֙ אֶתֵּ֣ן שָׁל֔וֹם נְאֻ֖ם יְהוָ֥ה צְבָאֽוֹת׃ פ
10	בְּעֶשְׂרִ֤ים וְאַרְבָּעָה֙ לַתְּשִׁיעִ֔י בִּשְׁנַ֥ת שְׁתַּ֖יִם לְדָרְיָ֑וֶשׁ הָיָה֙ דְּבַר־ יְהוָ֔ה אֶל־ חַגַּ֥י הַנָּבִ֖יא לֵאמֹֽר׃
	(Mur. 88 22,38) [בעשרים וארבעה ל]תשיעי ב֯[שנת שתים] (Mur. 88 22,39) [לדריוש היה דבר יהו]ה֯ אל ח֯גי ה[נביא לאמר ]
11	כֹּ֥ה אָמַ֖ר יְהוָ֣ה צְבָא֑וֹת שְׁאַל־ נָ֧א אֶת־ הַכֹּהֲנִ֛ים תּוֹרָ֖ה לֵאמֹֽר׃
12	הֵ֣ן ׀ יִשָּׂא־ אִ֨ישׁ בְּשַׂר־ קֹ֜דֶשׁ בִּכְנַ֣ף בִּגְד֗וֹ וְנָגַ֣ע בִּ֠כְנָפוֹ אֶל־ הַלֶּ֨חֶם וְאֶל־ הַנָּזִ֜יד וְאֶל־ הַיַּ֧יִן וְאֶל־ שֶׁ֛מֶן וְאֶל־ כָּל־ מַאֲכָ֖ל הֲיִקְדָּ֑שׁ וַיַּעֲנ֧וּ הַכֹּהֲנִ֛ים וַיֹּאמְר֖וּ לֹֽא׃
	(Mur. 88 23,4) ואל[ שמן ואל כל מאכל היקדש ויענו הכהנים] (Mur. 88 23,5) ויאמ[רו] ל[א
13	וַיֹּ֣אמֶר חַגַּ֔י אִם־ יִגַּ֧ע טְמֵא־ נֶ֛פֶשׁ בְּכָל־ אֵ֖לֶּה הֲיִטְמָ֑א וַיַּעֲנ֧וּ הַכֹּהֲנִ֛ים וַיֹּאמְר֖וּ יִטְמָֽא׃
	(Mur. 88 23,5) ויאמר חגי אם יגע טמא נפש] (Mur. 88 23,6) בכל אל[ה] היט֯[מא ויענו הכהנים ויאמרו יטמא ]
14	וַיַּ֨עַן חַגַּ֜י וַיֹּ֗אמֶר כֵּ֣ן הָֽעָם־ הַ֠זֶּה וְכֵן־ הַגּ֨וֹי הַזֶּ֤ה לְפָנַי֙ נְאֻם־ יְהוָ֔ה וְכֵ֖ן כָּל־ מַעֲשֵׂ֣ה יְדֵיהֶ֑ם וַאֲשֶׁ֥ר יַקְרִ֛יבוּ שָׁ֖ם טָמֵ֥א הֽוּא׃
	(Mur. 88 23,8) ויען חג[י] ויא[מר כן העם הזה וכן הגוי הזה לפני] (Mur. 88 23,9) נאם יהוה וכ֯[ן כל מעשה ידיהם ואשר יקריבו] (Mur. 88 23,10) שם טמא [הו]א֯
15	וְעַתָּה֙ שִֽׂימוּ־ נָ֣א לְבַבְכֶ֔ם מִן־ הַיּ֥וֹם הַזֶּ֖ה וָמָ֑עְלָה מִטֶּ֧רֶם שֽׂוּם־ אֶ֛בֶן אֶל־ אֶ֖בֶן בְּהֵיכַ֥ל יְהוָֽה׃
	(Mur. 88 23,10) [ועתה שימו נא לבבכם מן היום] (Mur. 88 23,11) הזה ומעלה מט[רם שום אבן אל אבן] (Mur. 88 23,12) בהיכל יהוה
16	מִֽהְיוֹתָ֥ם בָּא֙ אֶל־ עֲרֵמַ֣ת עֶשְׂרִ֔ים וְהָיְתָ֖ה עֲשָׂרָ֑ה בָּ֣א אֶל־ הַיֶּ֗קֶב לַחְשֹׂף֙ חֲמִשִּׁ֣ים פּוּרָ֔ה וְהָיְתָ֖ה עֶשְׂרִֽים׃
	(Mur. 88 23,12) [מהיותם בא אל ערמת] (Mur. 88 23,13) עשרים והיתה֯[ עשרה בא אל היקב לחשף] (Mur. 88 23,14) ח֯מ֯שים פורה [והיתה עשרים
17	הִכֵּ֨יתִי אֶתְכֶ֜ם בַּשִּׁדָּפ֤וֹן וּבַיֵּֽרָקוֹן֙ וּבַבָּרָ֔ד אֵ֖ת כָּל־ מַעֲשֵׂ֣ה יְדֵיכֶ֑ם וְאֵין־ אֶתְכֶ֥ם אֵלַ֖י נְאֻם־ יְהוָֽה׃
	(Mur. 88 23,14) הכיתי אתכם] (Mur. 88 23,15) בש[דפ]ון וביר[קון ובברד את כל מעשה] (Mur. 88 23,16) [ידיכם ואין את]כ֯ם א[לי נאם יהוה
18	שִׂימוּ־ נָ֣א לְבַבְכֶ֔ם מִן־ הַיּ֥וֹם הַזֶּ֖ה וָמָ֑עְלָה מִיּוֹם֩ עֶשְׂרִ֨ים וְאַרְבָּעָ֜ה לַתְּשִׁיעִ֗י לְמִן־ הַיּ֛וֹם אֲשֶׁר־ יֻסַּ֥ד הֵֽיכַל־ יְהוָ֖ה שִׂ֥ימוּ לְבַבְכֶֽם׃
	(4Q80 frg. 1,1) [וארבעה לתשיעי למן ה]יום [אשר יסד היכל יהוה שימו] (4Q80 frg. 1,2) [לבבכם (Mur. 88 23,16) שימו נא] (Mur. 88 23,17) [לבבכם מן ]ה֯יום֯ ה֯זה[ ומעלה מיום עשרים] (Mur. 88 23,18) [וארבעה לתשיעי למן היום אשר יסד היכל] (Mur. 88 23,19) [יהוה שימו לבבכם
19	הַע֤וֹד הַזֶּ֙רַע֙ בַּמְּגוּרָ֔ה וְעַד־ הַגֶּ֨פֶן וְהַתְּאֵנָ֧ה וְהָרִמּ֛וֹן וְעֵ֥ץ הַזַּ֖יִת לֹ֣א נָשָׂ֑א מִן־ הַיּ֥וֹם הַזֶּ֖ה אֲבָרֵֽךְ׃ ס
	(4Q80 frg. 1,2) העוד הזרע במ]גורה [ועד הגפן והתאנה והרמון] (4Q80 frg. 1,3) [ועץ הזית לא ]נשא [מן היום הזה אברך ] (Mur. 88 23,19) העוד הזרע במגורה ועד הגפן והתאנה והרמון ועץ הזית לא נשא] (Mur. 88 23,20) מן [היום] הז֯[ה אברך ]
20	וַיְהִ֨י דְבַר־ יְהוָ֤ה ׀ שֵׁנִית֙ אֶל־ חַגַּ֔י בְּעֶשְׂרִ֧ים וְאַרְבָּעָ֛ה לַחֹ֖דֶשׁ לֵאמֹֽר׃
	(4Q80 frg. 2,1) [ויהי דבר יהוה שנית אל חגי] בעש[רים וארבעה לחדש] (4Q80 frg. 2,2) [לאמר (Mur. 88 23,22) ויהי דבר יהו[ה] ש[נית אל חגי בעשרים] (Mur. 88 23,23) וארבעה לחדש לאמ֯[ר
21	אֱמֹ֕ר אֶל־ זְרֻבָּבֶ֥ל פַּֽחַת־ יְהוּדָ֖ה לֵאמֹ֑ר אֲנִ֣י מַרְעִ֔ישׁ אֶת־ הַשָּׁמַ֖יִם וְאֶת־ הָאָֽרֶץ׃
	(4Q80 frg. 2,2) אמר אל זרבבל] פחת י[הודה לאמר אני מרעיש את השמים] (4Q80 frg. 2,3) [ואת הארץ ] (Mur. 88 23,23) אמר אל זרבבל] (Mur. 88 23,24) פחת יהודה לאמר אני[ מרעיש את השמים] (Mur. 88 23,25) ואת הארץ
22	וְהָֽפַכְתִּי֙ כִּסֵּ֣א מַמְלָכ֔וֹת וְהִ֨שְׁמַדְתִּ֔י חֹ֖זֶק מַמְלְכ֣וֹת הַגּוֹיִ֑ם וְהָפַכְתִּ֤י מֶרְכָּבָה֙ וְרֹ֣כְבֶ֔יהָ וְיָרְד֤וּ סוּסִים֙ וְרֹ֣כְבֵיהֶ֔ם אִ֖ישׁ בְּחֶ֥רֶב אָחִֽיו׃
	(Mur. 88 23,25) וה[פכתי כסא ממלכות והשמדתי] (Mur. 88 23,26) [ח]ז֯ק מ[מ]ל[כו]ת֯[ הגוים והפכתי מרכבה ורכביה] (Mur. 88 23,27) וירדו ס[וסים ורכביהם איש בחרב אחיו
23	בַּיּ֣וֹם הַה֣וּא נְאֻם־ יְהוָ֣ה צְבָא֡וֹת אֶ֠קָּחֲךָ זְרֻבָּבֶ֨ל בֶּן־ שְׁאַלְתִּיאֵ֤ל עַבְדִּי֙ נְאֻם־ יְהוָ֔ה וְשַׂמְתִּ֖יךָ כַּֽחוֹתָ֑ם כִּֽי־ בְךָ֣ בָחַ֔רְתִּי נְאֻ֖ם יְהוָ֥ה צְבָאֽוֹת׃
	(Mur. 88 23,27) ביום] (Mur. 88 23,28) הה֯[וא נאם יהוה צבאות אקחך זרבבל בן שאלתיאל עבדי] (Mur. 88 23,29) נא֯[ם יהוה] ו֯[שמתיך כחותם כי בך בחרתי] (Mur. 88 23,30) נאם יהוה צבא֯[ות ]