1
1	דְּבַר־ יְהוָ֣ה ׀ אֲשֶׁ֣ר הָיָ֗ה אֶל־ צְפַנְיָה֙ בֶּן־ כּוּשִׁ֣י בֶן־ גְּדַלְיָ֔ה בֶּן־ אֲמַרְיָ֖ה בֶּן־ חִזְקִיָּ֑ה בִּימֵ֛י יֹאשִׁיָּ֥הוּ בֶן־ אָמ֖וֹן מֶ֥לֶךְ יְהוּדָֽה׃
	(4Q77 frg. 1,1) [בן חזקיה בימי יאשיהו בן אמון] מלך יהודה (Mur. 88 19,27) ד֯ב֯[ר י]ה֯וה אשר֯ ה֯יה֯[ אל צפניה בן כושי בן גדליה בן אמריה בן חזקיה בימי] (Mur. 88 19,28) [יאשיה]ו֯ בן א[מון מלך יהודה -- ]
2	אָסֹ֨ף אָסֵ֜ף כֹּ֗ל מֵעַ֛ל פְּנֵ֥י הָאֲדָמָ֖ה נְאֻם־ יְהוָֽה׃
	(4Q77 frg. 1,1) אסף[ אסף כל מעל] (4Q77 frg. 1,2) [פני האדמה נאם יהוה …
3	אָסֵ֨ף אָדָ֜ם וּבְהֵמָ֗ה אָסֵ֤ף עוֹף־ הַשָּׁמַ֙יִם֙ וּדְגֵ֣י הַיָּ֔ם וְהַמַּכְשֵׁל֖וֹת אֶת־ הָרְשָׁעִ֑ים וְהִכְרַתִּ֣י אֶת־ הָאָדָ֗ם מֵעַ֛ל פְּנֵ֥י הָאֲדָמָ֖ה נְאֻם־ יְהוָֽה׃
4	וְנָטִ֤יתִי יָדִי֙ עַל־ יְהוּדָ֔ה וְעַ֖ל כָּל־ יוֹשְׁבֵ֣י יְרוּשָׁלָ֑͏ִם וְהִכְרַתִּ֞י מִן־ הַמָּק֤וֹם הַזֶּה֙ אֶת־ שְׁאָ֣ר הַבַּ֔עַל אֶת־ שֵׁ֥ם הַכְּמָרִ֖ים עִם־ הַכֹּהֲנִֽים׃
5	וְאֶת־ הַמִּשְׁתַּחֲוִ֥ים עַל־ הַגַּגּ֖וֹת לִצְבָ֣א הַשָּׁמָ֑יִם וְאֶת־ הַמִּֽשְׁתַּחֲוִים֙ הַנִּשְׁבָּעִ֣ים לַֽיהוָ֔ה וְהַנִּשְׁבָּעִ֖ים בְּמַלְכָּֽם׃
6	וְאֶת־ הַנְּסוֹגִ֖ים מֵאַחֲרֵ֣י יְהוָ֑ה וַאֲשֶׁ֛ר לֹֽא־ בִקְשׁ֥וּ אֶת־ יְהוָ֖ה וְלֹ֥א דְרָשֻֽׁהוּ׃
7	הַ֕ס מִפְּנֵ֖י אֲדֹנָ֣י יְהוִ֑ה כִּ֤י קָרוֹב֙ י֣וֹם יְהוָ֔ה כִּֽי־ הֵכִ֧ין יְהוָ֛ה זֶ֖בַח הִקְדִּ֥ישׁ קְרֻאָֽיו׃
8	וְהָיָ֗ה בְּיוֹם֙ זֶ֣בַח יְהוָ֔ה וּפָקַדְתִּ֥י עַל־ הַשָּׂרִ֖ים וְעַל־ בְּנֵ֣י הַמֶּ֑לֶךְ וְעַ֥ל כָּל־ הַלֹּבְשִׁ֖ים מַלְבּ֥וּשׁ נָכְרִֽי׃
9	וּפָקַדְתִּ֗י עַ֧ל כָּל־ הַדּוֹלֵ֛ג עַל־ הַמִּפְתָּ֖ן בַּיּ֣וֹם הַה֑וּא הַֽמְמַלְאִ֛ים בֵּ֥ית אֲדֹנֵיהֶ֖ם חָמָ֥ס וּמִרְמָֽה׃ ס
10	וְהָיָה֩ בַיּ֨וֹם הַה֜וּא נְאֻם־ יְהוָ֗ה ק֤וֹל צְעָקָה֙ מִשַּׁ֣עַר הַדָּגִ֔ים וִֽילָלָ֖ה מִן־ הַמִּשְׁנֶ֑ה וְשֶׁ֥בֶר גָּד֖וֹל מֵהַגְּבָעֽוֹת׃
11	הֵילִ֖ילוּ יֹשְׁבֵ֣י הַמַּכְתֵּ֑שׁ כִּ֤י נִדְמָה֙ כָּל־ עַ֣ם כְּנַ֔עַן נִכְרְת֖וּ כָּל־ נְטִ֥ילֵי כָֽסֶף׃
	(Mur. 88 20,1) [ה]מכתש כי נדמה כל עם כנע֯ן נ֯[כרתו כל נטילי כסף
12	וְהָיָה֙ בָּעֵ֣ת הַהִ֔יא אֲחַפֵּ֥שׂ אֶת־ יְרוּשָׁלַ֖͏ִם בַּנֵּר֑וֹת וּפָקַדְתִּ֣י עַל־ הָאֲנָשִׁ֗ים הַקֹּֽפְאִים֙ עַל־ שִׁמְרֵיהֶ֔ם הָאֹֽמְרִים֙ בִּלְבָבָ֔ם לֹֽא־ יֵיטִ֥יב יְהוָ֖ה וְלֹ֥א יָרֵֽעַ׃
	(4Q170 frg. 1-2,1) לוא ייטי]ב יהוה ול֯[ו]א ירע (Mur. 88 20,1) והיה בעת ההיא] (Mur. 88 20,2) אחפש את ירושלם בנרות [ופקדתי על האנשים הקפאים על שמריהם] (Mur. 88 20,3) האמר[ים] ב֯לבבם ל֯א֯ ייטיב יהוה ולא֯[ ירע
13	וְהָיָ֤ה חֵילָם֙ לִמְשִׁסָּ֔ה וּבָתֵּיהֶ֖ם לִשְׁמָמָ֑ה וּבָנ֤וּ בָתִּים֙ וְלֹ֣א יֵשֵׁ֔בוּ וְנָטְע֣וּ כְרָמִ֔ים וְלֹ֥א יִשְׁתּ֖וּ אֶת־ יֵינָֽם׃
	(4Q170 frg. 1-2,1) והיה֯ [חילם למ]שיסה ו֯[בתיהם לשממה --] (Mur. 88 20,3) והיה חילם למשסה ובתיהם] (Mur. 88 20,4) לשממה ו֯ב֯נ֯ו֯ ב֯[תים ו]ל֯[א י]שבו ו֯[נטעו כרמים ולא ישתו את יינם
14	קָר֤וֹב יוֹם־ יְהוָה֙ הַגָּד֔וֹל קָר֖וֹב וּמַהֵ֣ר מְאֹ֑ד ק֚וֹל י֣וֹם יְהוָ֔ה מַ֥ר צֹרֵ֖חַ שָׁ֥ם גִּבּֽוֹר׃
	(Mur. 88 20,4) קרוב] (Mur. 88 20,5) [יום יהוה ]ה֯גד[ול] קרוב ו֯מ֯[הר מאד קול יום יהוה מר צרח שם] (Mur. 88 20,6) [גבור
15	י֥וֹם עֶבְרָ֖ה הַיּ֣וֹם הַה֑וּא י֧וֹם צָרָ֣ה וּמְצוּקָ֗ה י֤וֹם שֹׁאָה֙ וּמְשׁוֹאָ֔ה י֥וֹם חֹ֙שֶׁךְ֙ וַאֲפֵלָ֔ה י֥וֹם עָנָ֖ן וַעֲרָפֶֽל׃
	(Mur. 88 20,6) יום ]עב֯רה [היו]ם֯ [הה]ו֯א [יום צרה ומצוקה יום שאה ומשואה] (Mur. 88 20,7) [יום חשך ואפלה יום ענן ו]ע֯ר֯פ֯ל
16	י֥וֹם שׁוֹפָ֖ר וּתְרוּעָ֑ה עַ֚ל הֶעָרִ֣ים הַבְּצֻר֔וֹת וְעַ֖ל הַפִּנּ֥וֹת הַגְּבֹהֽוֹת׃
	(Mur. 88 20,7) יום שופר [ו]תר֯ועה [על הערים הבצרות] (Mur. 88 20,8) [ועל הפנות הגבהות
17	וַהֲצֵרֹ֣תִי לָאָדָ֗ם וְהָֽלְכוּ֙ כַּֽעִוְרִ֔ים כִּ֥י לַֽיהוָ֖ה חָטָ֑אוּ וְשֻׁפַּ֤ךְ דָּמָם֙ כֶּֽעָפָ֔ר וּלְחֻמָ֖ם כַּגְּלָלִֽים׃
	(Mur. 88 20,8) והצר]תי לאדם֯ ו֯הלכו כ֯[עורים כי לי]ה֯[וה] ח֯ט֯[או ושפך] (Mur. 88 20,9) [דמם כעפר ו]לחמם כגלל[י]ם֯
18	גַּם־ כַּסְפָּ֨ם גַּם־ זְהָבָ֜ם לֹֽא־ יוּכַ֣ל לְהַצִּילָ֗ם בְּיוֹם֙ עֶבְרַ֣ת יְהוָ֔ה וּבְאֵשׁ֙ קִנְאָת֔וֹ תֵּאָכֵ֖ל כָּל־ הָאָ֑רֶץ כִּֽי־ כָלָ֤ה אַךְ־ נִבְהָלָה֙ יַֽעֲשֶׂ֔ה אֵ֥ת כָּל־ יֹשְׁבֵ֖י הָאָֽרֶץ׃ ס
	(1Q15 frg. 1,1) [ביום עברת יהוה ובאש קנ]אתו תאכ[ל כל הארץ כי כלה אך] (1Q15 frg. 1,2) [נבהלה יעשה את כל יוש]בי ה[א]רץ (Mur. 88 20,9) גם כספם גמ זהב֯[ם לא יוכל להצילם ביום] (Mur. 88 20,10) [עבר]ת֯ יהוה ובא֯ש ק֯נאתו תא֯[כ]ל כל הארץ כ֯[י כלה אך נבהלה יעשה] (Mur. 88 20,11) את כל ישבי האר[ץ]

2
1	הִֽתְקוֹשְׁשׁ֖וּ וָק֑וֹשּׁוּ הַגּ֖וֹי לֹ֥א נִכְסָֽף׃
	(1Q15 frg. 1,2) התקו[ששו וקו]ש[ו] ○ (Mur. 88 20,11) התקששו וקשו הגוי֯ ל֯א֯[ נכסף
2	בְּטֶ֙רֶם֙ לֶ֣דֶת חֹ֔ק כְּמֹ֖ץ עָ֣בַר י֑וֹם בְּטֶ֣רֶם ׀ לֹא־ יָב֣וֹא עֲלֵיכֶ֗ם חֲרוֹן֙ אַף־ יְהוָ֔ה בְּטֶ֙רֶם֙ לֹא־ יָב֣וֹא עֲלֵיכֶ֔ם י֖וֹם אַף־ יְהוָֽה׃
	(1Q15 frg. 1,3) נכסף בטרם לא יבוא עליכ]ם חרון אף י[הוה] (1Q15 frg. 1,4) [בטרם לא יבוא עליכם יום א]ף יהוה פשר (Mur. 88 20,11) בטרם לדת חק] (Mur. 88 20,12) כמץ עבר [י]ום [בטרם] לא יבוא על[י]כם חרון אף יהוה בטרם [לא] יבוא[ עליכם] (Mur. 88 20,13) יום אף י֯[הוה
3	בַּקְּשׁ֤וּ אֶת־ יְהוָה֙ כָּל־ עַנְוֵ֣י הָאָ֔רֶץ אֲשֶׁ֥ר מִשְׁפָּט֖וֹ פָּעָ֑לוּ בַּקְּשׁוּ־ צֶ֙דֶק֙ בַּקְּשׁ֣וּ עֲנָוָ֔ה אוּלַי֙ תִּסָּ֣תְר֔וּ בְּי֖וֹם אַף־ יְהוָֽה׃
	(Mur. 88 20,13) בק]שו את יהוה כל [ע]נ֯וי ארץ אשר משפטו [פ]עלו בקש[ו] (Mur. 88 20,14) צ[ד]ק בקשו ענוה אולי תסתר[ו] ב֯י֯ום אף י֯[ה]וה
4	כִּ֤י עַזָּה֙ עֲזוּבָ֣ה תִֽהְיֶ֔ה וְאַשְׁקְל֖וֹן לִשְׁמָמָ֑ה אַשְׁדּ֗וֹד בַּֽצָּהֳרַ֙יִם֙ יְגָ֣רְשׁ֔וּהָ וְעֶקְר֖וֹן תֵּעָקֵֽר׃ ס
	(Mur. 88 20,14) כי עזה֯ ע֯ז֯ו֯בה תה֯[יה] (Mur. 88 20,15) [וא]שקלון לש֯מ֯מה אשד֯[וד בצ]ה֯רי֯ם יגרש[ו]ה וע֯קרון ת֯[עקר ]
5	ה֗וֹי יֹֽשְׁבֵ֛י חֶ֥בֶל הַיָּ֖ם גּ֣וֹי כְּרֵתִ֑ים דְּבַר־ יְהוָ֣ה עֲלֵיכֶ֗ם כְּנַ֙עַן֙ אֶ֣רֶץ פְּלִשְׁתִּ֔ים וְהַאֲבַדְתִּ֖יךְ מֵאֵ֥ין יוֹשֵֽׁב׃
	(Mur. 88 20,16) הוי ישב֯י֯ חבל הים [ג]וי כרתים דבר יהוה ע֯לי֯כ֯ם֯ [כנען ארץ] (Mur. 88 20,17) [פלשתים] וה֯א֯בדתיך מאין יושב
6	וְֽהָיְתָ֞ה חֶ֣בֶל הַיָּ֗ם נְוֺ֛ת כְּרֹ֥ת רֹעִ֖ים וְגִדְר֥וֹת צֹֽאן׃
	(Mur. 88 20,17) ו֯הית֯ה חבל הים֯ [נו]ת כר[ת רעים וגדרות] (Mur. 88 20,18) צ[אן]
7	וְהָ֣יָה חֶ֗בֶל לִשְׁאֵרִ֛ית בֵּ֥ית יְהוּדָ֖ה עֲלֵיהֶ֣ם יִרְע֑וּן בְּבָתֵּ֣י אַשְׁקְל֗וֹן בָּעֶ֙רֶב֙ יִרְבָּצ֔וּן כִּ֧י יִפְקְדֵ֛ם יְהוָ֥ה אֱלֹהֵיהֶ֖ם וְשָׁ֥ב שבותם (שְׁבִיתָֽם׃)
	(Mur. 88 20,18) והיה חבל לשארית בית יהודה על[י]ה֯ם יר֯ע֯ון ב֯בתי א֯[שקלון בערב] (Mur. 88 20,19) ירב֯צון כ֯י֯ יפקדם יה[ו]ה אלה[י]הם ושב [ש]ב֯[ו]ת[ם
8	שָׁמַ֙עְתִּי֙ חֶרְפַּ֣ת מוֹאָ֔ב וְגִדּוּפֵ֖י בְּנֵ֣י עַמּ֑וֹן אֲשֶׁ֤ר חֵֽרְפוּ֙ אֶת־ עַמִּ֔י וַיַּגְדִּ֖ילוּ עַל־ גְּבוּלָֽם׃
	(Mur. 88 20,19) שמעתי חרפת מואב] (Mur. 88 20,20) וגדופ֯י בני ע֯מ֯ון אשר֯ חרפו֯ א֯ת עמי֯ [ויגד]י֯לו על [ג]בו֯[לם
9	לָכֵ֣ן חַי־ אָ֡נִי נְאֻם֩ יְהוָ֨ה צְבָא֜וֹת אֱלֹהֵ֣י יִשְׂרָאֵ֗ל כִּֽי־ מוֹאָ֞ב כִּסְדֹ֤ם תִּֽהְיֶה֙ וּבְנֵ֤י עַמּוֹן֙ כַּֽעֲמֹרָ֔ה מִמְשַׁ֥ק חָר֛וּל וּמִכְרֵה־ מֶ֥לַח וּשְׁמָמָ֖ה עַד־ עוֹלָ֑ם שְׁאֵרִ֤ית עַמִּי֙ יְבָזּ֔וּם וְיֶ֥תֶר גוי (גּוֹיִ֖י) יִנְחָלֽוּם׃
	(Mur. 88 20,20) לכן חי אני נאם] (Mur. 88 20,21) יהוה [צבאו]ת אל[הי ישר]אל כ֯[י] מ[ואב כסדם תהיה ובני עמון כעמרה] (Mur. 88 20,22) [ממ]שק֯ חר֯ו֯ל ו֯מ֯כר֯ה מל[ח ו]שממה[ עד עולם שארית עמי יבזום] (Mur. 88 20,23) [ויתר גוי] י֯נ֯ח֯לום
10	זֹ֥את לָהֶ֖ם תַּ֣חַת גְּאוֹנָ֑ם כִּ֤י חֵֽרְפוּ֙ וַיַּגְדִּ֔לוּ עַל־ עַ֖ם יְהוָ֥ה צְבָאֽוֹת׃
	(Mur. 88 20,23) [ז]את להם ת֯חת ג֯[אונם כי חרפו ויגדלו על עם] (Mur. 88 20,24) [יהוה צבאות
11	נוֹרָ֤א יְהוָה֙ עֲלֵיהֶ֔ם כִּ֣י רָזָ֔ה אֵ֖ת כָּל־ אֱלֹהֵ֣י הָאָ֑רֶץ וְיִשְׁתַּֽחֲווּ־ לוֹ֙ אִ֣ישׁ מִמְּקוֹמ֔וֹ כֹּ֖ל אִיֵּ֥י הַגּוֹיִֽם׃
	(Mur. 88 20,24) נורא יהוה ]על[י]הם [כי רזה את כל אלהי הארץ] (Mur. 88 20,25) [וי]ש֯ת֯ח[וו לו איש ממקומו כל איי ]הגו֯[י]ם֯
12	גַּם־ אַתֶּ֣ם כּוּשִׁ֔ים חַֽלְלֵ֥י חַרְבִּ֖י הֵֽמָּה׃
	(Mur. 88 20,25) גם [אתם כושים] (Mur. 88 20,26) [חללי חרבי המה
13	וְיֵ֤ט יָדוֹ֙ עַל־ צָפ֔וֹן וִֽיאַבֵּ֖ד אֶת־ אַשּׁ֑וּר וְיָשֵׂ֤ם אֶת־ נִֽינְוֵה֙ לִשְׁמָמָ֔ה צִיָּ֖ה כַּמִּדְבָּֽר׃
	(4Q77 frg. 2 ii,1) [צפון] ו֯יאב את [אשור וישם את נינוה לשממה ציה כמדבר ] (Mur. 88 20,26) ויט ידו על צפון ו]י֯א[ב]ד֯ את [א]שור֯ ו֯[י]שם֯[ את] (Mur. 88 20,27) [נינוה לשממה ציה כמדבר
14	וְרָבְצ֨וּ בְתוֹכָ֤הּ עֲדָרִים֙ כָּל־ חַיְתוֹ־ ג֔וֹי גַּם־ קָאַת֙ גַּם־ קִפֹּ֔ד בְּכַפְתֹּרֶ֖יהָ יָלִ֑ינוּ ק֠וֹל יְשׁוֹרֵ֤ר בַּֽחַלּוֹן֙ חֹ֣רֶב בַּסַּ֔ף כִּ֥י אַרְזָ֖ה עֵרָֽה׃
	(4Q77 frg. 2 ii,2) [ורב]צ֯ו בתוכה [עדרים כל חיתו גוי גם קאת גם קפד] (4Q77 frg. 2 ii,3) בכפתוריה יל[ינו קול ישורר בחלון חרב בסף כי] (4Q77 frg. 2 ii,4) ארזה ערה (Mur. 88 20,27) ורבצו ב]תוכה עדרים כ֯[ל] חיתו גוי[ גם קאת] (Mur. 88 20,28) [גם קפד בכפתריה ילינו קול ישורר ]בחלון חרב בסף כ[י] ארזה ערה
15	זֹ֞֠את הָעִ֤יר הָעַלִּיזָה֙ הַיּוֹשֶׁ֣בֶת לָבֶ֔טַח הָאֹֽמְרָה֙ בִּלְבָבָ֔הּ אֲנִ֖י וְאַפְסִ֣י ע֑וֹד אֵ֣יךְ ׀ הָיְתָ֣ה לְשַׁמָּ֗ה מַרְבֵּץ֙ לַֽחַיָּ֔ה כֹּ֚ל עוֹבֵ֣ר עָלֶ֔יהָ יִשְׁרֹ֖ק יָנִ֥יעַ יָדֽוֹ׃ ס
	(4Q77 frg. 2 ii,4) זא[ת העיר העליזה היושבת לבטח] (4Q77 frg. 2 ii,5) האמרה[ ב]ל[בבה אני ואפסי עוד איך היתה לשמה] (4Q77 frg. 2 ii,6) מ֯ר֯[ב]ץ֯[ לחיה כל עובר עליה ישרק יניע ידו ] (4Q78 frg. 34,1) זאת העיר] (4Q78 frg. 34,2) [העליזה היושבת לבטח האומרה בל]בבה אנ[י ואפסי עוד איך היתה לשמה] (4Q78 frg. 34,3) [מרבץ לחיה כל עובר עליה י]שרוק יניע א֯ת֯ יד֯[ו (Mur. 88 20,28) [זאת העיר ה]ע֯ל֯[יז]ה (Mur. 88 20,29) [היושבת לבטח ]ה֯אמרה בלבבה אני וא[פ]סי עוד[ איך היתה ]לשמה (Mur. 88 20,30) [מרבץ לחיה ]כל עובר עליה ישרק יניע ידו

3
1	ה֥וֹי מֹרְאָ֖ה וְנִגְאָלָ֑ה הָעִ֖יר הַיּוֹנָֽה׃
	(4Q78 frg. 34,3) הוי מראה ונגאלה] (4Q78 frg. 34,4) [העיר היונה (Mur. 88 20,32) [הוי מר]אה ונגאלה העיר היונה
2	לֹ֤א שָֽׁמְעָה֙ בְּק֔וֹל לֹ֥א לָקְחָ֖ה מוּסָ֑ר בַּֽיהוָה֙ לֹ֣א בָטָ֔חָה אֶל־ אֱלֹהֶ֖יהָ לֹ֥א קָרֵֽבָה׃
	(4Q78 frg. 34,4) לא שמעה בקול לא לקחה מוסר] ביהוה לוא בט[חה אל] (4Q78 frg. 34,5) [אלהיה לא קרבה … (Mur. 88 20,32) לא ש֯מ֯[עה] ב֯קול ל[א לקח]ה מוסר (Mur. 88 20,33) [ביהו]ה לא בטחה אל אלהיה לא קרבה
3	שָׂרֶ֣יהָ בְקִרְבָּ֔הּ אֲרָי֖וֹת שֹֽׁאֲגִ֑ים שֹׁפְטֶ֙יהָ֙ זְאֵ֣בֵי עֶ֔רֶב לֹ֥א גָרְמ֖וּ לַבֹּֽקֶר׃
	(4Q82 frg. 103,1) ע[רב לא גרמו לבקר (Mur. 88 20,33) שריה בק֯[רבה אר]יות֯ שאגים֯ (Mur. 88 20,34) [שפטיה] זאבי ערב לא גרמו לבקר
4	נְבִיאֶ֙יהָ֙ פֹּֽחֲזִ֔ים אַנְשֵׁ֖י בֹּֽגְד֑וֹת כֹּהֲנֶ֙יהָ֙ חִלְּלוּ־ קֹ֔דֶשׁ חָמְס֖וּ תּוֹרָֽה׃
	(4Q439 frg. 1 i+2,8) [אנש]י ([]○) בוגדו֯ת֯[ (בוגדי֯ם֯[) --] (4Q469 frg. 3,4) אנשי בוג[דות --] (4Q82 frg. 103,1) נביאיה פחזים אנשי בגדות כהניה חללו קדש] (4Q82 frg. 103,2) חמ[סו תורה (Mur. 88 20,34) נביא[י]ה פחזים א֯[נ]ש֯י֯ ב֯ג[דות] כ֯הנ֯י֯[ה] (Mur. 88 20,35) [חללו קדש ]חמסו תורה
5	יְהוָ֤ה צַדִּיק֙ בְּקִרְבָּ֔הּ לֹ֥א יַעֲשֶׂ֖ה עַוְלָ֑ה בַּבֹּ֨קֶר בַּבֹּ֜קֶר מִשְׁפָּט֨וֹ יִתֵּ֤ן לָאוֹר֙ לֹ֣א נֶעְדָּ֔ר וְלֹֽא־ יוֹדֵ֥עַ עַוָּ֖ל בֹּֽשֶׁת׃
	(4Q82 frg. 103,2) יהוה צדיק בקרבה לא יעשה עולה בבקר בבקר משפטו יתן לאור] (4Q82 frg. 103,3) לא֯[ נעדר ולא יודע עול בשת -- ] (Mur. 88 20,35) יה֯[ו]ה֯ צדיק ב֯[קרבה ל]א֯ יעשה[ עולה בבקר בבקר] (Mur. 88 20,36) [משפ]ט֯ו֯ [י]תן֯ לאור ל֯[א נ]עדר[ ולא יודע] ע֯ול[ בשת
6	הִכְרַ֣תִּי גוֹיִ֗ם נָשַׁ֙מּוּ֙ פִּנּוֹתָ֔ם הֶחֱרַ֥בְתִּי חֽוּצוֹתָ֖ם מִבְּלִ֣י עוֹבֵ֑ר נִצְדּ֧וּ עָרֵיהֶ֛ם מִבְּלִי־ אִ֖ישׁ מֵאֵ֥ין יוֹשֵֽׁב׃
	(Mur. 88 20,36) הכרתי גוים נשמו] (Mur. 88 20,37) [פנותם החרבתי חוצותם מב]ל֯[י עובר נצדו עריהם מבלי איש מאין יושב ]
7	אָמַ֜רְתִּי אַךְ־ תִּירְאִ֤י אוֹתִי֙ תִּקְחִ֣י מוּסָ֔ר וְלֹֽא־ יִכָּרֵ֣ת מְעוֹנָ֔הּ כֹּ֥ל אֲשֶׁר־ פָּקַ֖דְתִּי עָלֶ֑יהָ אָכֵן֙ הִשְׁכִּ֣ימוּ הִשְׁחִ֔יתוּ כֹּ֖ל עֲלִילוֹתָֽם׃
8	לָכֵ֤ן חַכּוּ־ לִי֙ נְאֻם־ יְהוָ֔ה לְי֖וֹם קוּמִ֣י לְעַ֑ד כִּ֣י מִשְׁפָּטִי֩ לֶאֱסֹ֨ף גּוֹיִ֜ם לְקָבְצִ֣י מַמְלָכ֗וֹת לִשְׁפֹּ֨ךְ עֲלֵיהֶ֤ם זַעְמִי֙ כֹּ֚ל חֲר֣וֹן אַפִּ֔י כִּ֚י בְּאֵ֣שׁ קִנְאָתִ֔י תֵּאָכֵ֖ל כָּל־ הָאָֽרֶץ׃
	(Mur. 88 21,1) [לכן חכו לי נאם יהוה ליום קומי ]לעד כ֯י משפטי֯ לאסף֯ גוים (Mur. 88 21,2) [לקבצי ממלכות לשפך עליה]ם זע֯מי כל חר֯ון֯ אפי כ֯י֯ באש קנאתי (Mur. 88 21,3) [תאכל כל הארץ
9	כִּֽי־ אָ֛ז אֶהְפֹּ֥ךְ אֶל־ עַמִּ֖ים שָׂפָ֣ה בְרוּרָ֑ה לִקְרֹ֤א כֻלָּם֙ בְּשֵׁ֣ם יְהוָ֔ה לְעָבְד֖וֹ שְׁכֶ֥ם אֶחָֽד׃
	(4Q464 frg. 3 i,9) אהפך] אל עמים שפה ברורה (Mur. 88 21,3) כי אז אהפך ]על העמים שפה ברורה לק֯ר֯א כלם (Mur. 88 21,4) [בשם יהוה לעבדו ש]כ֯ם אחד֯
10	מֵעֵ֖בֶר לְנַֽהֲרֵי־ כ֑וּשׁ עֲתָרַי֙ בַּת־ פוּצַ֔י יוֹבִל֖וּן מִנְחָתִֽי׃
	(Mur. 88 21,4) מעבר לנה֯ר֯י כוש עתרי ב֯ת֯ פוצי י֯ו֯ב֯לון (Mur. 88 21,5) [מנחתי
11	בַּיּ֣וֹם הַה֗וּא לֹ֤א תֵב֙וֹשִׁי֙ מִכֹּ֣ל עֲלִילֹתַ֔יִךְ אֲשֶׁ֥ר פָּשַׁ֖עַתְּ בִּ֑י כִּי־ אָ֣ז ׀ אָסִ֣יר מִקִּרְבֵּ֗ךְ עַלִּיזֵי֙ גַּאֲוָתֵ֔ךְ וְלֹֽא־ תוֹסִ֧פִי לְגָבְהָ֛ה ע֖וֹד בְּהַ֥ר קָדְשִֽׁי׃
	(Mur. 88 21,5) ביום ההוא ]ל֯א ת֯בושי מ[כ]ל ע֯לילותיך אשר פשעת בי כ֯י֯ א֯ז֯ (Mur. 88 21,6) [אסיר מקרבך עליזי גאו]תך ולא ת֯ו֯ס֯פי לג֯בה֯ה עוד בהר קדשי
12	וְהִשְׁאַרְתִּ֣י בְקִרְבֵּ֔ךְ עַ֥ם עָנִ֖י וָדָ֑ל וְחָס֖וּ בְּשֵׁ֥ם יְהוָֽה׃
	(Mur. 88 21,7) [והשארתי בקרבך עם ע]נ֯י ודל וחסו בשם֯ יהוה
13	שְׁאֵרִ֨ית יִשְׂרָאֵ֜ל לֹֽא־ יַעֲשׂ֤וּ עַוְלָה֙ וְלֹא־ יְדַבְּר֣וּ כָזָ֔ב וְלֹֽא־ יִמָּצֵ֥א בְּפִיהֶ֖ם לְשׁ֣וֹן תַּרְמִ֑ית כִּֽי־ הֵ֛מָּה יִרְע֥וּ וְרָבְצ֖וּ וְאֵ֥ין מַחֲרִֽיד׃ ס
	(Mur. 88 21,7) [שא]רית [י]שראל לא (Mur. 88 21,8) [יעשו עולה ולא ידברו כז]ב֯ ולא ימצא בפיהם לשון תרמית [כי] המה (Mur. 88 21,9) [ירעו ור]ב֯צו ואין מ֯חריד
14	רָנִּי֙ בַּת־ צִיּ֔וֹן הָרִ֖יעוּ יִשְׂרָאֵ֑ל שִׂמְחִ֤י וְעָלְזִי֙ בְּכָל־ לֵ֔ב בַּ֖ת יְרוּשָׁלָֽ͏ִם׃
	(Mur. 88 21,10) ר֯נ֯י֯ ב֯ת ציון הריע֯ו֯ ישראל שמחי ועלזי בכל לב בת֯ (Mur. 88 21,11) [ירוש]לם֯
15	הֵסִ֤יר יְהוָה֙ מִשְׁפָּטַ֔יִךְ פִּנָּ֖ה אֹֽיְבֵ֑ךְ מֶ֣לֶךְ יִשְׂרָאֵ֤ל ׀ יְהוָה֙ בְּקִרְבֵּ֔ךְ לֹא־ תִֽירְאִ֥י רָ֖ע עֽוֹד׃
	(Mur. 88 21,11) [הסיר י]ה֯ו֯ה֯ מ֯שפטיך֯ פנה איביך מלך ישראל יהוה בקרבך (Mur. 88 21,12) [לא תיר]אי רע עוד
16	בַּיּ֣וֹם הַה֔וּא יֵאָמֵ֥ר לִירֽוּשָׁלַ֖͏ִם אַל־ תִּירָ֑אִי צִיּ֖וֹן אַל־ יִרְפּ֥וּ יָדָֽיִךְ׃
	(Mur. 88 21,12) ב[יום ההו]א יאמר לירושלם אל ת֯ירא֯י (Mur. 88 21,13) [ציון א]ל ירפו ידיך
17	יְהוָ֧ה אֱלֹהַ֛יִךְ בְּקִרְבֵּ֖ך גִּבּ֣וֹר יוֹשִׁ֑יעַ יָשִׂ֨ישׂ עָלַ֜יִךְ בְּשִׂמְחָ֗ה יַחֲרִישׁ֙ בְּאַ֣הֲבָת֔וֹ יָגִ֥יל עָלַ֖יִךְ בְּרִנָּֽה׃
	(Mur. 88 21,13) [יהוה אלהיך ב]ק֯ר֯ב֯ך֯ גבור יושיע ישיש עליך (Mur. 88 21,14) בשמחה יחריש באהב[תו יגיל עלי]ך ברנה
18	נוּגֵ֧י מִמּוֹעֵ֛ד אָסַ֖פְתִּי מִמֵּ֣ךְ הָי֑וּ מַשְׂאֵ֥ת עָלֶ֖יהָ חֶרְפָּֽה׃
	(Mur. 88 21,14) נוגי ממועד אספת[י] ממך (Mur. 88 21,15) [הי]ו משאת עליה חרפה
19	הִנְנִ֥י עֹשֶׂ֛ה אֶת־ כָּל־ מְעַנַּ֖יִךְ בָּעֵ֣ת הַהִ֑יא וְהוֹשַׁעְתִּ֣י אֶת־ הַצֹּלֵעָ֗ה וְהַנִּדָּחָה֙ אֲקַבֵּ֔ץ וְשַׂמְתִּים֙ לִתְהִלָּ֣ה וּלְשֵׁ֔ם בְּכָל־ הָאָ֖רֶץ בָּשְׁתָּֽם׃
	(4Q77 frg. 3,1) [הנני עשה ]א֯ת כל מעניך [בעת ההיא והושעתי את הצלעה והנדחה] (4Q77 frg. 3,2) [אקב]ץ ושמתים לתהלה ולש[ם בכל הארץ בשתם (Mur. 88 21,15) הנני עשה את כל מעניך בעת הה֯[י]א (Mur. 88 21,16) ו֯ה֯ו֯שעת[י א]ת הצלעה והנד֯חה אקבץ ושמתים לתהלה ולשם (Mur. 88 21,17) ב֯כ֯ל הארץ בשתם
20	בָּעֵ֤ת הַהִיא֙ אָבִ֣יא אֶתְכֶ֔ם וּבָעֵ֖ת קַבְּצִ֣י אֶתְכֶ֑ם כִּֽי־ אֶתֵּ֨ן אֶתְכֶ֜ם לְשֵׁ֣ם וְלִתְהִלָּ֗ה בְּכֹל֙ עַמֵּ֣י הָאָ֔רֶץ בְּשׁוּבִ֧י אֶת־ שְׁבוּתֵיכֶ֛ם לְעֵינֵיכֶ֖ם אָמַ֥ר יְהוָֽה׃
	(4Q77 frg. 3,2) בעת ההיא אביא] (4Q77 frg. 3,3) [אתכ]ם ובעת קבצי אתכם כי אתן א[תכם לשם ולתהלה בכל עמי] (4Q77 frg. 3,4) [הארץ ]ב֯שובי את שבותיכם לעיניכם [אמר יהוה ] (Mur. 88 21,17) בעת הה֯יא אביא אתכם ובעת קבצי אתכם (Mur. 88 21,18) כי אתן [את]כם לשם ולתהלה בכל עמי הארץ בש[וב]י את שבותי֯כם (Mur. 88 21,19) לעיניכם אמר יהוה