| 1 | ויאמר יהוה אל משה ואהרן זאת חקת הפסח כל בן נכר לא יאכל בו כל עבד איש ומקנת |
| 2 | כסף ומלתה א[ת]ו אז יאכל בו תושב ושכיר לא יאכל בו בבית אחד יאכל לא תוציאו מן |
| 3 | הביתה הבש[ר] חוצה ועצם לא תשברו בו כל עדת ישראל יעשו אותו וכי יגור אתכם |
| 4 | גר ועשה פסח ליהוה המול לו כל זכר ואז יקרב לעשותו והיה כאזרח הארץ כל ערל |
| 5 | לא יאכל בו תורה אחת יהיה לאזרח ולגר הגר בתוככם ויעשו כל בני ישראל |
| 6 | ככל אשר צוה יהוה את משה ואת אהרן כן עשו ויהי בעצם היום הזה הוציא |
| 7 | יהוה את בני ישר[א]ל מארץ מצרים על צבאותם וידבר יהוה אל משה לאמור |
| 8 | קדש לי כל בכור פטר כל רחם בבני ישראל באדם ובבהמה לי הוא ויאמר משה |
| 9 | אל העם זכור את היום הזה אשר יצאתם ממצרים מבית עבדים כי בחזק |
| 10 | יד הוציא יהוה אתכם מזה ולא יאכל חמץ היום אתם יצאים בחדש האביב והיה כי |
| 11 | יביאך יהוה אל ארץ הכנעני והחתי והאמרי והחוי והיבוסי אשר נשבע לאבתיך |
| 12 | לתת לך ארצ זבת חלב ודבש ועבדת את העבודה הזאת בחדש הזה שבעת ימים |
| 13 | תאכל מצות וביום השביעי חג ליהוה מצות יאכל את שבעת הימים ולא |
| 14 | יראה לך חמצ ולא יראה לך שאר בכל גבולך והגדת ל[ב]נך ביום ההוא |
| 15 | לאמר בעבור זה עשה יהוה לי בצאתי ממצרים והיה לך לאות על ידיך |
| 16 | ולזכרון בין עיניך למען תהיה תורת יהוה בפיך כי ב[יד] חזקה הוציאך |
| 17 | יהוה ממצרים ושמרת את החקה הזאת למועדה מימים ימימה |
| 18 | ועתה ישראל מה יהוה אלהיך שאל מעמך כי אם ליר[אה את יהוה אלהיך ] |
| 19 | ללכת בכל דרכיו ולאהבה אתו ולעבד את יהוה אלהיך בכל לבבך ובכל |
| 20 | שך ולשמר את מצות יהוה אלהיך ואת חקיו אשר אנכי מצוך היום לטוב |
| 21 | לך הן ליהוה אלהיך השמים ושמי השמים הארץ וכל אשר בה רק באבותיך |
| 22 | חשק יהוה לאהבה אתם ויבחר בזרעם אחריהם בכם מכל העמים |
| 23 | כיום הזה ומלתם את ערלת לבבכם וערפכם לא תקשו עוד כי יהוה אלהיכם |
| 24 | הוא אלהי האלהים ואדני האדנים האל הגדול הגבור והנורא |
| 25 | אשר לא ישא פנים ולא יקח שחד משפט גר יתום ואלמנה ואהב |
| 26 | גר לתת לו לחם ושמלה ואהבתם את הגר כי גרים הייתם בארץ מצרים |