1
1	חֲז֖וֹן עֹֽבַדְיָ֑ה כֹּֽה־ אָמַר֩ אֲדֹנָ֨י יְהוִ֜ה לֶאֱד֗וֹם שְׁמוּעָ֨ה שָׁמַ֜עְנוּ מֵאֵ֤ת יְהוָה֙ וְצִיר֙ בַּגּוֹיִ֣ם שֻׁלָּ֔ח ק֛וּמוּ וְנָק֥וּמָה עָלֶיהָ לַמִּלְחָמָֽה׃
	(4Q82 frg. 70-75,6) חזון עובד֯[יה כה אמר אדוני יהוה לאדום שמועה שמענו מאת יהוה] (4Q82 frg. 70-75,7) וציר בג֯[וים שלח קומו ונקומה עליה למלחמה (Mur. 88 9,3) [ח]ז֯ון[ עבדיה כה ]אמ֯ר֯[ אדני יהוה לאדום שמועה ש]מ֯ע֯נ֯ו (Mur. 88 9,4) מאת יהו[ה ו]צ֯י֯ר֯ בגוים [שלח קומו ונקו]מ֯ה [על]י֯ה למלחמה
2	הִנֵּ֥ה קָטֹ֛ן נְתַתִּ֖יךָ בַּגּוֹיִ֑ם בָּז֥וּי אַתָּ֖ה מְאֹֽד׃
	(4Q82 frg. 70-75,7) הנה קטן נתתיך בגוים] (4Q82 frg. 70-75,8) בזוי אתה[ מאד (Mur. 88 9,5) [ה]נה קט֯ן נ֯ת֯[תי]ך בגוים בזוי את֯[ה מאד
3	זְד֤וֹן לִבְּךָ֙ הִשִּׁיאֶ֔ךָ שֹׁכְנִ֥י בְחַגְוֵי־ סֶּ֖לַע מְר֣וֹם שִׁבְתּ֑וֹ אֹמֵ֣ר בְּלִבּ֔וֹ מִ֥י יוֹרִדֵ֖נִי אָֽרֶץ׃
	(4Q82 frg. 70-75,8) זדון לבך השיאך שכני בחגוי סלע מרום שבתו] (4Q82 frg. 70-75,9) אמר בל[בו מי יורדני ארץ (Mur. 88 9,5) זדון ל]בך ה֯ש֯יאך שכנ[י] (Mur. 88 9,6) בחגוי סלע מרום שב[תו] אמ֯[ר ב]לבו מ֯י֯ יורדני ארץ
4	אִם־ תַּגְבִּ֣יהַּ כַּנֶּ֔שֶׁר וְאִם־ בֵּ֥ין כּֽוֹכָבִ֖ים שִׂ֣ים קִנֶּ֑ךָ מִשָּׁ֥ם אוֹרִֽידְךָ֖ נְאֻם־ יְהוָֽה׃
	(4Q82 frg. 70-75,9) אם תגביה כנשר ואם בין כוכבים] (4Q82 frg. 70-75,10) תשים ק֯[נכה משם אורידך נאם יהוה (Mur. 88 9,7) א֯ם֯ תגביה כנשר ואם ב֯[י]ן֯ כוכבים שים קנך מ֯ש֯ם֯ (Mur. 88 9,8) [א]ורידך נאם יהוה
5	אִם־ גַּנָּבִ֤ים בָּאֽוּ־ לְךָ֙ אִם־ שׁ֣וֹדְדֵי לַ֔יְלָה אֵ֣יךְ נִדְמֵ֔יתָה הֲל֥וֹא יִגְנְב֖וּ דַּיָּ֑ם אִם־ בֹּֽצְרִים֙ בָּ֣אוּ לָ֔ךְ הֲל֖וֹא יַשְׁאִ֥ירוּ עֹלֵלֽוֹת׃
	(4Q82 frg. 70-75,10) אם גנבים באו לך אם שודדי] (4Q82 frg. 70-75,11) ל[ילה איך נדמיתה הלוא יגנבו דים אם בצרים באו לך הלוא ישאירו] (4Q82 frg. 70-75,12) [עללות (Mur. 88 9,8) אם גנבים באו לך אם [ש֯ודדי] (Mur. 88 9,9) לילה איך נדמיתה הלוא יגנבו דים אם ב֯צ֯[רי]ם [באו] (Mur. 88 9,10) לך הלוא ישאי֯ר֯ו֯ על֯ל֯ו֯ת
6	אֵ֚יךְ נֶחְפְּשׂ֣וּ עֵשָׂ֔ו נִבְע֖וּ מַצְפֻּנָֽיו׃
	(4Q82 frg. 70-75,12) איך נחפשו עשו נבעו מצפניו (Mur. 88 9,10) איך֯ נחפשו עשו נ֯בעו מצפנ[יו ]
7	עַֽד־ הַגְּב֣וּל שִׁלְּח֗וּךָ כֹּ֚ל אַנְשֵׁ֣י בְרִיתֶ֔ךָ הִשִּׁיא֛וּךָ יָכְל֥וּ לְךָ֖ אַנְשֵׁ֣י שְׁלֹמֶ֑ךָ לַחְמְךָ֗ יָשִׂ֤ימוּ מָזוֹר֙ תַּחְתֶּ֔יךָ אֵ֥ין תְּבוּנָ֖ה בּֽוֹ׃
	(4Q82 frg. 70-75,12) עד הגבול שלחוך כל אנשי] (4Q82 frg. 70-75,13) [בריתך השיאוך יכלו לך אנשי שלמך לחמך ישימו מזור תחתיך אין] (4Q82 frg. 70-75,14) [תבונה בו (Mur. 88 9,11) ע֯ד֯ הגבול שלחוך כל אנשי בריתך השיאוך יכלו לך (Mur. 88 9,12) אנשי [שלמך] לחמך ישימ֯ו מז֯ור תחתיך א[ין] ת֯בונ֯ה֯ בו
8	הֲל֛וֹא בַּיּ֥וֹם הַה֖וּא נְאֻם־ יְהוָ֑ה וְהַאֲבַדְתִּ֤י חֲכָמִים֙ מֵֽאֱד֔וֹם וּתְבוּנָ֖ה מֵהַ֥ר עֵשָֽׂו׃
	(4Q82 frg. 70-75,14) הלוא ביו]ם ה֯[הוא נאם יהוה והאבדתי] (4Q82 frg. 70-75,15) [חכמים מאדום ותבונה מהר עשו (Mur. 88 9,13) הלוא ביום הה֯וא נאם יהוה והאבדתי חכמים מ֯[אד]ום (Mur. 88 9,14) ותבונ[ה מ]הר עשו
9	וְחַתּ֥וּ גִבּוֹרֶ֖יךָ תֵּימָ֑ן לְמַ֧עַן יִכָּֽרֶת־ אִ֛ישׁ מֵהַ֥ר עֵשָׂ֖ו מִקָּֽטֶל׃
	(4Q82 frg. 70-75,15) ]וחתו [גבוריכה תי]מן למ֯[ען יכרת] (4Q82 frg. 70-75,16) [איש מהר עשו מקטל (Mur. 88 9,14) וחתו גבור[י]ך֯ תימן למ֯[ע]ן֯ יכרת [אי]ש (Mur. 88 9,15) מה֯ר֯ עשו מ֯קטל
10	מֵחֲמַ֛ס אָחִ֥יךָ יַעֲקֹ֖ב תְּכַסְּךָ֣ בוּשָׁ֑ה וְנִכְרַ֖תָּ לְעוֹלָֽם׃
	(4Q82 frg. 70-75,16) מחמס אחיכה ]יעקו֯[ב תכסכה ב]ושה ו֯[נכרת] (4Q82 frg. 70-75,17) [לעולם (Mur. 88 9,15) מחמס א֯ח֯יך יעקב תכ[סך] ב֯ו֯ש֯ה֯ [ונכ]ר֯ת (Mur. 88 9,16) לע[ו]לם
11	בְּיוֹם֙ עֲמָֽדְךָ֣ מִנֶּ֔גֶד בְּי֛וֹם שְׁב֥וֹת זָרִ֖ים חֵיל֑וֹ וְנָכְרִ֞ים בָּ֣אוּ שערו (שְׁעָרָ֗יו) וְעַל־ יְרוּשָׁלִַ֙ם֙ יַדּ֣וּ גוֹרָ֔ל גַּם־ אַתָּ֖ה כְּאַחַ֥ד מֵהֶֽם׃
	(4Q82 frg. 70-75,17) ביום עמדך מנגד -- ]○ו שב○[ ]ז֯רי֯[ם חילו ונכרים באו שערו] (4Q82 frg. 70-75,18) [ועל ירושלם ידו גור]ל גם[ אתה כאחד מהם (Mur. 88 9,16) ביום עמדך מ֯נ֯גד֯ ביום שבו֯ת זרים [חילו] (Mur. 88 9,17) ונכרים באו שערו [ו]על ירושלם ידו גו[רל גם את]ה (Mur. 88 9,18) כאחד [מ]הם
12	וְאַל־ תֵּ֤רֶא בְיוֹם־ אָחִ֙יךָ֙ בְּי֣וֹם נָכְר֔וֹ וְאַל־ תִּשְׂמַ֥ח לִבְנֵֽי־ יְהוּדָ֖ה בְּי֣וֹם אָבְדָ֑ם וְאַל־ תַּגְדֵּ֥ל פִּ֖יךָ בְּי֥וֹם צָרָֽה׃
	(4Q82 frg. 70-75,18) ואל תרא ביום] (4Q82 frg. 70-75,19) [אחיך ביום נכרו וא]ל[ תשמח לבני יהודה ביום אבדם ואל תגדל] (4Q82 frg. 70-75,20) [פיך ביום צרה (Mur. 88 9,18) ואל תרא ביום אחיך ביום נכ[רו ו]אל (Mur. 88 9,19) תשמח לבני יהודה ביום אבדם ואל ת[גדל] פיך ב[יו]ם֯ (Mur. 88 9,20) צרה
13	אַל־ תָּב֤וֹא בְשַֽׁעַר־ עַמִּי֙ בְּי֣וֹם אֵידָ֔ם אַל־ תֵּ֧רֶא גַם־ אַתָּ֛ה בְּרָעָת֖וֹ בְּי֣וֹם אֵיד֑וֹ וְאַל־ תִּשְׁלַ֥חְנָה בְחֵיל֖וֹ בְּי֥וֹם אֵידֽוֹ׃
	(4Q82 frg. 70-75,20) אל תבוא בשער עמי ביום אידם אל תרא] (4Q82 frg. 70-75,21) [גם אתה ברעתו ביום אידו ואל תשלחנה בחילו ביום] (4Q82 frg. 70-75,22) [אידו (Mur. 88 9,20) ואל תבוא בשער עמי ביום אידם [א]ל [תרא] (Mur. 88 9,21) גם אתה֯ [בר]עתו ביום אידו ואל תשלחנה֯ [בח]יל[ו] ב[יום] (Mur. 88 9,22) אידו
14	וְאַֽל־ תַּעֲמֹד֙ עַל־ הַפֶּ֔רֶק לְהַכְרִ֖ית אֶת־ פְּלִיטָ֑יו וְאַל־ תַּסְגֵּ֥ר שְׂרִידָ֖יו בְּי֥וֹם צָרָֽה׃
	(4Q82 frg. 70-75,22) ואל תעמד על הפר]ק֯ להכ֯[ר]י֯ת֯[ את פליטיו ואל תסגר] (4Q82 frg. 70-75,23) [שרידיו ביום צרה (Mur. 88 9,22) ו[א]ל תעמד על הפרק להכרית את פלי֯[ט]י֯ו֯ ואל (Mur. 88 9,23) תסגר שרידיו ביום צרה
15	כִּֽי־ קָר֥וֹב יוֹם־ יְהוָ֖ה עַל־ כָּל־ הַגּוֹיִ֑ם כַּאֲשֶׁ֤ר עָשִׂ֙יתָ֙ יֵעָ֣שֶׂה לָּ֔ךְ גְּמֻלְךָ֖ יָשׁ֥וּב בְּרֹאשֶֽׁךָ׃
	(4Q82 frg. 70-75,23) כי קרו]ב֯ יום יה֯[וה על כל הגוים כאשר] (4Q82 frg. 70-75,24) [עשית יעשה לך גמולכ]ה֯ שובו ב֯[ראשכה -- ] (Mur. 88 9,23) כי קרוב יום יה[וה] ע֯ל כל (Mur. 88 9,24) הגוים כאשר עשי֯ת יעשה לך גמלך֯ ישו֯ב בראשך
16	כִּ֗י כַּֽאֲשֶׁ֤ר שְׁתִיתֶם֙ עַל־ הַ֣ר קָדְשִׁ֔י יִשְׁתּ֥וּ כָֽל־ הַגּוֹיִ֖ם תָּמִ֑יד וְשָׁת֣וּ וְלָע֔וּ וְהָי֖וּ כְּל֥וֹא הָיֽוּ׃
	(Mur. 88 9,25) כי כאשר שתיתם על הר קדשי [י]שתו כל הגוי֯ם ת֯מ֯יד (Mur. 88 9,26) וש֯תו ולעו והיו כלוא היו
17	וּבְהַ֥ר צִיּ֛וֹן תִּהְיֶ֥ה פְלֵיטָ֖ה וְהָ֣יָה קֹ֑דֶשׁ וְיָֽרְשׁוּ֙ בֵּ֣ית יַֽעֲקֹ֔ב אֵ֖ת מוֹרָֽשֵׁיהֶם׃
	(Mur. 88 9,26) ו[ב]ה֯ר ציון תהיה פליטה (Mur. 88 9,27) ו֯היה קדש וירשו֯ בית [י]ע֯קב את מורישיהם
18	וְהָיָה֩ בֵית־ יַעֲקֹ֨ב אֵ֜שׁ וּבֵ֧ית יוֹסֵ֣ף לֶהָבָ֗ה וּבֵ֤ית עֵשָׂו֙ לְקַ֔שׁ וְדָלְק֥וּ בָהֶ֖ם וַאֲכָל֑וּם וְלֹֽא־ יִֽהְיֶ֤ה שָׂרִיד֙ לְבֵ֣ית עֵשָׂ֔ו כִּ֥י יְהוָ֖ה דִּבֵּֽר׃
	(Mur. 88 9,27) והיה (Mur. 88 9,28) [בי]ת יעקב אש ובי֯ת יוסף להבה ובית עשו לק֯ש (Mur. 88 9,29) ודלקו בהם וא[כ]ל֯ום ולא יהיה שריד לבית עשו כי (Mur. 88 9,30) יהוה דבר
19	וְיָרְשׁ֨וּ הַנֶּ֜גֶב אֶת־ הַ֣ר עֵשָׂ֗ו וְהַשְּׁפֵלָה֙ אֶת־ פְּלִשְׁתִּ֔ים וְיָרְשׁוּ֙ אֶת־ שְׂדֵ֣ה אֶפְרַ֔יִם וְאֵ֖ת שְׂדֵ֣ה שֹׁמְר֑וֹן וּבִנְיָמִ֖ן אֶת־ הַגִּלְעָֽד׃
	(Mur. 88 9,30) [וירשו ]הנ֯גב את֯ הר עשו והשפלה את פלש֯תים (Mur. 88 9,31) [ויר]ש֯ו֯[ את שדה] א֯פרים֯ ו֯[א]ת שדה שמרון [ו]ב[נ]ימן א[ת] (Mur. 88 9,32) ה֯ג֯לע֯[ד
20	וְגָלֻ֣ת הַֽחֵל־ הַ֠זֶּה לִבְנֵ֨י יִשְׂרָאֵ֤ל אֲשֶֽׁר־ כְּנַעֲנִים֙ עַד־ צָ֣רְפַ֔ת וְגָלֻ֥ת יְרוּשָׁלַ֖͏ִם אֲשֶׁ֣ר בִּסְפָרַ֑ד יִֽרְשׁ֕וּ אֵ֖ת עָרֵ֥י הַנֶּֽגֶב׃
	(Mur. 88 9,32) וגלת] ה֯ח֯ל הזה֯ [ל]ב֯ני [י]שראל אשר כנענ[י]ם עד (Mur. 88 9,33) [צרפת וגל]ת י֯ר֯ו֯שלם אשר ב֯ס֯פ֯ר֯ד ירשו את ע֯[רי] (Mur. 88 9,34) [הנגב
21	וְעָל֤וּ מֽוֹשִׁעִים֙ בְּהַ֣ר צִיּ֔וֹן לִשְׁפֹּ֖ט אֶת־ הַ֣ר עֵשָׂ֑ו וְהָיְתָ֥ה לַֽיהוָ֖ה הַמְּלוּכָֽה׃
	(Mur. 88 9,34) ועל]ו מ֯שעים בה֯ר ציון לשפט את הר [ע]שו (Mur. 88 9,35) וה[יתה לי]ה֯וה֯ ה֯מלוכה