1
1	דְּבַר־ יְהוָה֙ אֲשֶׁ֣ר הָיָ֔ה אֶל־ יוֹאֵ֖ל בֶּן־ פְּתוּאֵֽל׃
2	שִׁמְעוּ־ זֹאת֙ הַזְּקֵנִ֔ים וְהַֽאֲזִ֔ינוּ כֹּ֖ל יוֹשְׁבֵ֣י הָאָ֑רֶץ הֶהָ֤יְתָה זֹּאת֙ בִּֽימֵיכֶ֔ם וְאִ֖ם בִּימֵ֥י אֲבֹֽתֵיכֶֽם׃
3	עָלֶ֖יהָ לִבְנֵיכֶ֣ם סַפֵּ֑רוּ וּבְנֵיכֶם֙ לִבְנֵיהֶ֔ם וּבְנֵיהֶ֖ם לְד֥וֹר אַחֵֽר׃
4	יֶ֤תֶר הַגָּזָם֙ אָכַ֣ל הָֽאַרְבֶּ֔ה וְיֶ֥תֶר הָאַרְבֶּ֖ה אָכַ֣ל הַיָּ֑לֶק וְיֶ֣תֶר הַיֶּ֔לֶק אָכַ֖ל הֶחָסִֽיל׃
5	הָקִ֤יצוּ שִׁכּוֹרִים֙ וּבְכ֔וּ וְהֵילִ֖לוּ כָּל־ שֹׁ֣תֵי יָ֑יִן עַל־ עָסִ֕יס כִּ֥י נִכְרַ֖ת מִפִּיכֶֽם׃
6	כִּֽי־ גוֹי֙ עָלָ֣ה עַל־ אַרְצִ֔י עָצ֖וּם וְאֵ֣ין מִסְפָּ֑ר שִׁנָּיו֙ שִׁנֵּ֣י אַרְיֵ֔ה וּֽמְתַלְּע֥וֹת לָבִ֖יא לֽוֹ׃
7	שָׂ֤ם גַּפְנִי֙ לְשַׁמָּ֔ה וּתְאֵנָתִ֖י לִקְצָפָ֑ה חָשֹׂ֤ף חֲשָׂפָהּ֙ וְהִשְׁלִ֔יךְ הִלְבִּ֖ינוּ שָׂרִיגֶֽיהָ׃
8	אֱלִ֕י כִּבְתוּלָ֥ה חֲגֻֽרַת־ שַׂ֖ק עַל־ בַּ֥עַל נְעוּרֶֽיהָ׃
9	הָכְרַ֥ת מִנְחָ֛ה וָנֶ֖סֶךְ מִבֵּ֣ית יְהוָ֑ה אָֽבְלוּ֙ הַכֹּ֣הֲנִ֔ים מְשָׁרְתֵ֖י יְהוָֽה׃
10	שֻׁדַּ֣ד שָׂדֶ֔ה אָבְלָ֖ה אֲדָמָ֑ה כִּ֚י שֻׁדַּ֣ד דָּגָ֔ן הוֹבִ֥ישׁ תִּיר֖וֹשׁ אֻמְלַ֥ל יִצְהָֽר׃
	(4Q78 frg. 10-12,1) [שדה א]בלה אדמה כ[י שדד דגן הוביש תירוש אמלל יצהר
11	הֹבִ֣ישׁוּ אִכָּרִ֗ים הֵילִ֙ילוּ֙ כֹּֽרְמִ֔ים עַל־ חִטָּ֖ה וְעַל־ שְׂעֹרָ֑ה כִּ֥י אָבַ֖ד קְצִ֥יר שָׂדֶֽה׃
	(4Q78 frg. 10-12,1) הובישו אכרים הילילו כר]מ֯ים (4Q78 frg. 10-12,2) [על ח]טה ועל שער֯[ה כי אבד קציר שדה
12	הַגֶּ֣פֶן הוֹבִ֔ישָׁה וְהַתְּאֵנָ֖ה אֻמְלָ֑לָה רִמּ֞וֹן גַּם־ תָּמָ֣ר וְתַפּ֗וּחַ כָּל־ עֲצֵ֤י הַשָּׂדֶה֙ יָבֵ֔שׁוּ כִּֽי־ הֹבִ֥ישׁ שָׂשׂ֖וֹן מִן־ בְּנֵ֥י אָדָֽם׃ ס
	(4Q78 frg. 10-12,2) הגפן הובישה והתאנה גם תמר ותפוח אמלל]ה֯ רמון (4Q78 frg. 10-12,3) [גם תמר ותפוח כול ]עצי השדה י֯ב[שו כי הביש ששון מן בני אדם (4Q82 frg. 34-35,1) הגפן הובי]ש֯ה֯[ והתאנה אמללה רמון] (4Q82 frg. 34-35,2) [גם תמר ותפוח כל עצי השדה יבשו ]כי הביש ש֯ש[ו]ן מ֯[ן בני אדם ]
13	חִגְר֨וּ וְסִפְד֜וּ הַכֹּהֲנִ֗ים הֵילִ֙ילוּ֙ מְשָׁרְתֵ֣י מִזְבֵּ֔חַ בֹּ֚אוּ לִ֣ינוּ בַשַּׂקִּ֔ים מְשָׁרְתֵ֖י אֱלֹהָ֑י כִּ֥י נִמְנַ֛ע מִבֵּ֥ית אֱלֹהֵיכֶ֖ם מִנְחָ֥ה וָנָֽסֶךְ׃
	(4Q78 frg. 10-12,3) חגרו וספדו הכוהני]ם֯ ה֯י֯ל[י]לו֯ (4Q78 frg. 10-12,4) [מ]שרתי מזב[ח] ב֯[ואו לינו בשקים משרתי אלהי כי נמנע מבית אלהיכם מנחה ונסך (4Q82 frg. 34-35,3) [חגרו וספדו הכהנים הילילו ]○משרתי מ[זבח] באו לי[נו בשקים] (4Q82 frg. 34-35,4) [משרתי אלהי כי נמ]נע מבית א[ל]והיכם מנחה֯ ונ[סך
14	קַדְּשׁוּ־ צוֹם֙ קִרְא֣וּ עֲצָרָ֔ה אִסְפ֣וּ זְקֵנִ֗ים כֹּ֚ל יֹשְׁבֵ֣י הָאָ֔רֶץ בֵּ֖ית יְהוָ֣ה אֱלֹהֵיכֶ֑ם וְזַעֲק֖וּ אֶל־ יְהוָֽה׃
	(4Q78 frg. 10-12,4) קדשו] (4Q78 frg. 10-12,5) ]צ֯ום וקראו ע֯צ[רה אספו זקנים כל ישבי הארץ בית יהוה אלהיכם וזעקו אל יהוה (4Q82 frg. 34-35,4) קדשו צום] (4Q82 frg. 34-35,5) [קראו עצרה ]א֯סופו זק֯נ֯י֯ם כול יוש[ב]י֯ ה֯א֯ר֯[ץ בית יהוה אלהיכם] (4Q82 frg. 34-35,6) [וזעקו אל יהוה ]
15	אֲהָ֖הּ לַיּ֑וֹם כִּ֤י קָרוֹב֙ י֣וֹם יְהוָ֔ה וּכְשֹׁ֖ד מִשַׁדַּ֥י יָבֽוֹא׃
	(4Q78 frg. 10-12,5) אהה] (4Q78 frg. 10-12,6) ליום כי קרוב יום [יהוה וכשד משדי יבוא
16	הֲל֛וֹא נֶ֥גֶד עֵינֵ֖ינוּ אֹ֣כֶל נִכְרָ֑ת מִבֵּ֥ית אֱלֹהֵ֖ינוּ שִׂמְחָ֥ה וָגִֽיל׃
	(4Q78 frg. 10-12,6) הלוא נגד עינינו אכל נכרת מבית אלהינו שמחה] (4Q78 frg. 10-12,7) ו֯גיל
17	עָבְשׁ֣וּ פְרֻד֗וֹת תַּ֚חַת מֶגְרְפֹ֣תֵיהֶ֔ם נָשַׁ֙מּוּ֙ אֹֽצָר֔וֹת נֶהֶרְס֖וּ מַמְּגֻר֑וֹת כִּ֥י הֹבִ֖ישׁ דָּגָֽן׃
	(4Q78 frg. 10-12,7) עפשו פורות תחת מ֯[גרפתיהם נשמו אצרות נהרסו ממגרות כי הביש דגן
18	מַה־ נֶּאֶנְחָ֣ה בְהֵמָ֗ה נָבֹ֙כוּ֙ עֶדְרֵ֣י בָקָ֔ר כִּ֛י אֵ֥ין מִרְעֶ֖ה לָהֶ֑ם גַּם־ עֶדְרֵ֥י הַצֹּ֖אן נֶאְשָֽׁמוּ׃
	(4Q78 frg. 10-12,7) מה נאנחה] (4Q78 frg. 10-12,8) בהמה נ֯בוכו עדרי ה֯בקר כי א֯[ין מרעה להם גם עדרי הצאן נאשמו
19	אֵלֶ֥יךָ יְהוָ֖ה אֶקְרָ֑א כִּ֣י אֵ֗שׁ אָֽכְלָה֙ נְא֣וֹת מִדְבָּ֔ר וְלֶ֣הָבָ֔ה לִהֲטָ֖ה כָּל־ עֲצֵ֥י הַשָּׂדֶֽה׃
	(4Q78 frg. 10-12,8) אליך יהוה אקרא] (4Q78 frg. 10-12,9) כי אש אכלה נוות ה֯מדב֯[ר ולהבה להטה כל עצי השדה
20	גַּם־ בַּהֲמ֥וֹת שָׂדֶ֖ה תַּעֲר֣וֹג אֵלֶ֑יךָ כִּ֤י יָֽבְשׁוּ֙ אֲפִ֣יקֵי מָ֔יִם וְאֵ֕שׁ אָכְלָ֖ה נְא֥וֹת הַמִּדְבָּֽר׃ פ
	(4Q78 frg. 10-12,9) גם בהמות שדה תערוג אליך] (4Q78 frg. 10-12,10) כי יבשו אפקי מים ואש֯[ אכלה נאות המדבר ]

2
1	תִּקְע֨וּ שׁוֹפָ֜ר בְּצִיּ֗וֹן וְהָרִ֙יעוּ֙ בְּהַ֣ר קָדְשִׁ֔י יִרְגְּז֕וּ כֹּ֖ל יֹשְׁבֵ֣י הָאָ֑רֶץ כִּֽי־ בָ֥א יוֹם־ יְהוָ֖ה כִּ֥י קָרֽוֹב׃
	(4Q78 frg. 10-12,11) תקעו שופר בצי[ון והריעו בהר קדשי ירגזו כל ישבי הארץ כי בא יום יהוה כי קרוב ]
2	י֧וֹם חֹ֣שֶׁךְ וַאֲפֵלָ֗ה י֤וֹם עָנָן֙ וַעֲרָפֶ֔ל כְּשַׁ֖חַר פָּרֻ֣שׂ עַל־ הֶֽהָרִ֑ים עַ֚ם רַ֣ב וְעָצ֔וּם כָּמֹ֗הוּ לֹ֤א נִֽהְיָה֙ מִן־ הָ֣עוֹלָ֔ם וְאַֽחֲרָיו֙ לֹ֣א יוֹסֵ֔ף עַד־ שְׁנֵ֖י דּ֥וֹר וָדֽוֹר׃
	(4Q177 frg. 1-4,3) נהיה … (4Q82 frg. 30b+31aR+36-37,1) כשחר פרש ע]ל֯ ה[הרים עם רב ועצום כמהו לא נהיה] (4Q82 frg. 30b+31aR+36-37,2) -- ]○○[ -- לא י]ו֯סף ע[ד שני דור ודור
3	לְפָנָיו֙ אָ֣כְלָה אֵ֔שׁ וְאַחֲרָ֖יו תְּלַהֵ֣ט לֶֽהָבָ֑ה כְּגַן־ עֵ֨דֶן הָאָ֜רֶץ לְפָנָ֗יו וְאַֽחֲרָיו֙ מִדְבַּ֣ר שְׁמָמָ֔ה וְגַם־ פְּלֵיטָ֖ה לֹא־ הָ֥יְתָה לּֽוֹ׃
	(4Q82 frg. 30b+31aR+36-37,2) לפניו אכלה] (4Q82 frg. 30b+31aR+36-37,3) [אש ו]אחרי֯ו֯[ תלהט להב]ה כגן ע[דן הארץ לפניו ואחריו מדבר] (4Q82 frg. 30b+31aR+36-37,4) [שממה וג]ם פליט[ה לוא הית]ה ל[ו
4	כְּמַרְאֵ֥ה סוּסִ֖ים מַרְאֵ֑הוּ וּכְפָרָשִׁ֖ים כֵּ֥ן יְרוּצֽוּן׃
	(4Q82 frg. 30b+31aR+36-37,4) כמראה סוסים מראהו] (4Q82 frg. 30b+31aR+36-37,5) [וכפרשים כן ירוצון
5	כְּק֣וֹל מַרְכָּב֗וֹת עַל־ רָאשֵׁ֤י הֶֽהָרִים֙ יְרַקֵּד֔וּן כְּקוֹל֙ לַ֣הַב אֵ֔שׁ אֹכְלָ֖ה קָ֑שׁ כְּעַ֣ם עָצ֔וּם עֱר֖וּךְ מִלְחָמָֽה׃
	(4Q82 frg. 30b+31aR+36-37,5) כקו]ל֯[ מרכבות ]ע֯ל ראשי ההרים ירקד֯ו֯ן֯[ כקול] (4Q82 frg. 30b+31aR+36-37,6) [להב אש אכלה קש כעם ]ע֯צ֯ו֯ם֯ ע֯ר֯[וך] ל֯מ֯ל[ח]מ֯ה֯
6	מִפָּנָ֖יו יָחִ֣ילוּ עַמִּ֑ים כָּל־ פָּנִ֖ים קִבְּצ֥וּ פָארֽוּר׃
	(4Q82 frg. 30b+31aR+36-37,6) מ֯פ֯נ֯יו יחילו[ עמים] (4Q82 frg. 30b+31aR+36-37,7) [כל פנים קבצו פארור
7	כְּגִבּוֹרִ֣ים יְרֻצ֔וּן כְּאַנְשֵׁ֥י מִלְחָמָ֖ה יַעֲל֣וּ חוֹמָ֑ה וְאִ֤ישׁ בִּדְרָכָיו֙ יֵֽלֵכ֔וּן וְלֹ֥א יְעַבְּט֖וּן אֹרְחוֹתָֽם׃
	(4Q82 frg. 30b+31aR+36-37,7) כג]ב֯ו֯ר֯י֯ם֯[ י]ר֯ו֯צ֯[ו]ן כאנ[שי מ]ל֯חמה יעל[ו חומה] (4Q82 frg. 30b+31aR+36-37,8) [ואיש בדרכיו ילכון ולא] י֯[עבטון] ארחות֯ם֯
8	וְאִ֤ישׁ אָחִיו֙ לֹ֣א יִדְחָק֔וּן גֶּ֥בֶר בִּמְסִלָּת֖וֹ יֵֽלֵכ֑וּן וּבְעַ֥ד הַשֶּׁ֛לַח יִפֹּ֖לוּ לֹ֥א יִבְצָֽעוּ׃
	(4Q78 frg. 13,1) ואיש אחיו] (4Q78 frg. 13,2) [לא ידחקון גבר במסלתו ילכון ]○ בעד הש֯[לח יפלו לא יבצעו (4Q82 frg. 30b+31aR+36-37,8) ו[אי]ש֯ ואח[י]ו[ לא ידחקון] (4Q82 frg. 30b+31aR+36-37,9) [גבר במסלתו ילכון ובעד השלח ]יפלו --
9	בָּעִ֣יר יָשֹׁ֗קּוּ בַּֽחוֹמָה֙ יְרֻצ֔וּן בַּבָּתִּ֖ים יַעֲל֑וּ בְּעַ֧ד הַחַלּוֹנִ֛ים יָבֹ֖אוּ כַּגַּנָּֽב׃
	(4Q78 frg. 13,2) בעיר ישקו בחומה] (4Q78 frg. 13,3) [ירצון בבתים יעלו בעד הח]לונים יבואו כגנב (4Q82 frg. 30b+31aR+36-37,10) בעי]ר֯[ י]שקו בחומה יר֯צ֯ו֯ן֯[ בבתים יעלו בעד] (4Q82 frg. 30b+31aR+36-37,11) [החלונים יבאו כגנב
10	לְפָנָיו֙ רָ֣גְזָה אֶ֔רֶץ רָעֲשׁ֖וּ שָׁמָ֑יִם שֶׁ֤מֶשׁ וְיָרֵ֙חַ֙ קָדָ֔רוּ וְכוֹכָבִ֖ים אָסְפ֥וּ נָגְהָֽם׃
	(4Q78 frg. 13,3) לפניו֯[ רגזה ארץ רעשו שמים שמש] (4Q78 frg. 14-17,1) ]נוגהם (4Q82 frg. 30b+31aR+36-37,11) לפניו רגז]ה֯ ארץ רע֯ש֯ו֯[ -- ]○○[ -- ] (4Q82 frg. 30b+31aR+36-37,12) [קדרו וכוכבים אספו נגהם
11	וַֽיהוָ֗ה נָתַ֤ן קוֹלוֹ֙ לִפְנֵ֣י חֵיל֔וֹ כִּ֣י רַ֤ב מְאֹד֙ מַחֲנֵ֔הוּ כִּ֥י עָצ֖וּם עֹשֵׂ֣ה דְבָר֑וֹ כִּֽי־ גָד֧וֹל יוֹם־ יְהוָ֛ה וְנוֹרָ֥א מְאֹ֖ד וּמִ֥י יְכִילֶֽנּוּ׃
	(4Q78 frg. 14-17,1) ויהוה נת֯ן֯ קולו לפנ[י חילו כי רב מאד מחנהו כי עצום עשה דברו כי גדול יום יהוה] (4Q78 frg. 14-17,2) ]ונורא מואדה [ו]מי יכלכלנו (4Q82 frg. 30b+31aR+36-37,12) ויהוה נתן קולו לפני ]חילו כי רב[ מאד] (4Q82 frg. 30b+31aR+36-37,13) [מחנהו כי עצום עשה דברו כי גדול יו]ם יהו֯ה ונורא֯[ מאד ומי] (4Q82 frg. 30b+31aR+36-37,14) [יכילנו
12	וְגַם־ עַתָּה֙ נְאֻם־ יְהוָ֔ה שֻׁ֥בוּ עָדַ֖י בְּכָל־ לְבַבְכֶ֑ם וּבְצ֥וֹם וּבְבְכִ֖י וּבְמִסְפֵּֽד׃
	(4Q266 frg. 11,5) לשוב אל אל בבכי ובצום וב֯מקום֯ כתוב (4Q269 frg. 16,3) לשוב אל אל בבכי ובצום וכול המואס] (4Q270 frg. 7 i,19) לשוב אל אל בבכי ובצום] וכל המו[אס במשפטי]ם֯ (4Q78 frg. 14-17,2) ו֯גם֯ ע֯ת֯ה֯ [נאם יהוה שבו עדי בכל לבבכם ובצום ובבכי] (4Q78 frg. 14-17,3) ]ובמספד (4Q82 frg. 30b+31aR+36-37,14) וגם עתה נאם יהוה שבו עדי בכל לב]ב֯כם ובצו֯[ם ובבכי] (4Q82 frg. 30b+31aR+36-37,15) [ובמספד
13	וְקִרְע֤וּ לְבַבְכֶם֙ וְאַל־ בִּגְדֵיכֶ֔ם וְשׁ֖וּבוּ אֶל־ יְהוָ֣ה אֱלֹֽהֵיכֶ֑ם כִּֽי־ חַנּ֤וּן וְרַחוּם֙ ה֔וּא אֶ֤רֶךְ אַפַּ֙יִם֙ וְרַב־ חֶ֔סֶד וְנִחָ֖ם עַל־ הָרָעָֽה׃
	(4Q266 frg. 11,5) קרעו לבבכם ואל בגדיכם וכול המואס במשפטים (4Q269 frg. 16,2) כתוב קרעו לבבכם וא]ל (4Q269 frg. 16,3) [בגדיכם … (4Q270 frg. 7 i,19) קרעו לבבכם ואל בגדיכם … (4Q78 frg. 14-17,3) וקרעו לבבכמה ואל גדיכ֯[מה ושובו אל יהוה אלהיכם כי חנון ורחום הוא ארך] (4Q78 frg. 14-17,4) ]א֯פים ורב חסד֯ ונחם על הר[ע]ה֯[ (4Q82 frg. 30b+31aR+36-37,15) וקרעו לבבכם ואל בגדיכם ושובו ]אל יהוה אלוה֯[יכם]
14	מִ֥י יוֹדֵ֖עַ יָשׁ֣וּב וְנִחָ֑ם וְהִשְׁאִ֤יר אַֽחֲרָיו֙ בְּרָכָ֔ה מִנְחָ֣ה וָנֶ֔סֶךְ לַיהוָ֖ה אֱלֹהֵיכֶֽם׃ פ
	(4Q78 frg. 14-17,4) מי יודע ישוב ונחם והשאיר אחריו ברכה מנחה ונסך] (4Q78 frg. 14-17,5) ]ליהוה אלוהיכמה
15	תִּקְע֥וּ שׁוֹפָ֖ר בְּצִיּ֑וֹן קַדְּשׁוּ־ צ֖וֹם קִרְא֥וּ עֲצָרָֽה׃
	(4Q78 frg. 14-17,5) תקעו שופר בציון קדשו צום קראו עצרה
16	אִסְפוּ־ עָ֞ם קַדְּשׁ֤וּ קָהָל֙ קִבְצ֣וּ זְקֵנִ֔ים אִסְפוּ֙ עֽוֹלָלִ֔ים וְיֹנְקֵ֖י שָׁדָ֑יִם יֵצֵ֤א חָתָן֙ מֵֽחֶדְר֔וֹ וְכַלָּ֖ה מֵחֻפָּתָֽהּ׃
	(4Q78 frg. 14-17,6) ]אסופו עם קדשו קהל[ קבצו זקנים אספו עוללים וינקי שדים יצא חתן מחדרו וכלה] (4Q78 frg. 14-17,7) ]מחופתה
17	בֵּ֤ין הָאוּלָם֙ וְלַמִּזְבֵּ֔חַ יִבְכּוּ֙ הַכֹּ֣הֲנִ֔ים מְשָׁרְתֵ֖י יְהוָ֑ה וְֽיֹאמְר֞וּ ח֧וּסָה יְהוָ֣ה עַל־ עַמֶּ֗ךָ וְאַל־ תִּתֵּ֨ן נַחֲלָתְךָ֤ לְחֶרְפָּה֙ לִמְשָׁל־ בָּ֣ם גּוֹיִ֔ם לָ֚מָּה יֹאמְר֣וּ בָֽעַמִּ֔ים אַיֵּ֖ה אֱלֹהֵיהֶֽם׃
	(4Q78 frg. 14-17,7) בין האולם[ ולמזבח יבכו הכהנים משרתי יהוה ויאמרו חוסה יהוה על עמך ואל] (4Q78 frg. 14-17,8) ]תתן נחלתכה לחרפ֯[ה למשל ב]ם֯ גו[יים למה יאמרו בעמים איה אלהיהם
18	וַיְקַנֵּ֥א יְהוָ֖ה לְאַרְצ֑וֹ וַיַּחְמֹ֖ל עַל־ עַמּֽוֹ׃
	(4Q78 frg. 14-17,8) ויקנא יהוה] (4Q78 frg. 14-17,9) ]לארצו ויחמ֯[ול על] עמו
19	וַיַּ֨עַן יְהוָ֜ה וַיֹּ֣אמֶר לְעַמּ֗וֹ הִנְנִ֨י שֹׁלֵ֤חַ לָכֶם֙ אֶת־ הַדָּגָן֙ וְהַתִּיר֣וֹשׁ וְהַיִּצְהָ֔ר וּשְׂבַעְתֶּ֖ם אֹת֑וֹ וְלֹא־ אֶתֵּ֨ן אֶתְכֶ֥ם ע֛וֹד חֶרְפָּ֖ה בַּגּוֹיִֽם׃
	(4Q78 frg. 14-17,9) ו֯[יען יה]וה ו[יאמר לעמו הנני שלח לכם את הדגן והתירוש והיצהר] (4Q78 frg. 14-17,10) ואכלתמה ]ושבעתמ[ה אותו ו]לוא א[תן את]כמה [עוד חרפה בגוים
20	וְֽאֶת־ הַצְּפוֹנִ֞י אַרְחִ֣יק מֵעֲלֵיכֶ֗ם וְהִדַּחְתִּיו֮ אֶל־ אֶ֣רֶץ צִיָּ֣ה וּשְׁמָמָה֒ אֶת־ פָּנָ֗יו אֶל־ הַיָּם֙ הַקַּדְמֹנִ֔י וְסֹפ֖וֹ אֶל־ הַיָּ֣ם הָאַֽחֲר֑וֹן וְעָלָ֣ה בָאְשׁ֗וֹ וְתַ֙עַל֙ צַחֲנָת֔וֹ כִּ֥י הִגְדִּ֖יל לַעֲשֽׂוֹת׃
	(4Q78 frg. 14-17,10) ואת הצפוני ארחיק מעליכם והדחתיו] (4Q78 frg. 14-17,11) [א]ל[ ארץ ציה ו]שממה[ את] פניו אל ה[ים הקדמני וספו אל הים האחרון ועלה באשו ותעל] (4Q78 frg. 14-17,12) [צחנתו ]כי הגד[י]ל ל[עשות (Mur. 88 1,2) ואת] הצ֯פ֯וני[ ארחיק מעליכם והדחתיו אל ארץ] (Mur. 88 1,3) [ציה ושממ]ה֯ את פניו אל[ הים הקדמני וספו אל הים האחרון] (Mur. 88 1,4) [ועלה בא]ש֯ו ות֯על צ֯חנ֯[תו כי הגדיל לעשות ]
21	אַל־ תִּֽירְאִ֖י אֲדָמָ֑ה גִּ֣ילִי וּשְׂמָ֔חִי כִּֽי־ הִגְדִּ֥יל יְהוָ֖ה לַעֲשֽׂוֹת׃
	(4Q78 frg. 14-17,12) א]ל[ תיראי אדמה גילי ושמחי כי הגדיל יהוה לעשות
22	אַל־ תִּֽירְאוּ֙ בַּהֲמ֣וֹת שָׂדַ֔י כִּ֥י דָשְׁא֖וּ נְא֣וֹת מִדְבָּ֑ר כִּֽי־ עֵץ֙ נָשָׂ֣א פִרְי֔וֹ תְּאֵנָ֥ה וָגֶ֖פֶן נָתְנ֥וּ חֵילָֽם׃
	(4Q78 frg. 14-17,12) אל תיראו בהמות] (4Q78 frg. 14-17,13) [שד]י֯ כי דשא֯[ו נאות מדבר כי עץ נשא פריו תאנה וגפן נתנו חילם
23	וּבְנֵ֣י צִיּ֗וֹן גִּ֤ילוּ וְשִׂמְחוּ֙ בַּיהוָ֣ה אֱלֹֽהֵיכֶ֔ם כִּֽי־ נָתַ֥ן לָכֶ֛ם אֶת־ הַמּוֹרֶ֖ה לִצְדָקָ֑ה וַיּ֣וֹרֶד לָכֶ֗ם גֶּ֛שֶׁם מוֹרֶ֥ה וּמַלְק֖וֹשׁ בָּרִאשֽׁוֹן׃
	(4Q78 frg. 14-17,13) ובני ציון גילו ושמחו] (4Q78 frg. 14-17,14) [ביהוה א]ל[והיכמה כי נתן לכם את המורה לצדקה ויורד לכם גשם מורה ומלקוש בראשון ]
24	וּמָלְא֥וּ הַגֳּרָנ֖וֹת בָּ֑ר וְהֵשִׁ֥יקוּ הַיְקָבִ֖ים תִּיר֥וֹשׁ וְיִצְהָֽר׃
25	וְשִׁלַּמְתִּ֤י לָכֶם֙ אֶת־ הַשָּׁנִ֔ים אֲשֶׁר֙ אָכַ֣ל הָֽאַרְבֶּ֔ה הַיֶּ֖לֶק וְהֶחָסִ֣יל וְהַגָּזָ֑ם חֵילִי֙ הַגָּד֔וֹל אֲשֶׁ֥ר שִׁלַּ֖חְתִּי בָּכֶֽם׃
26	וַאֲכַלְתֶּ֤ם אָכוֹל֙ וְשָׂב֔וֹעַ וְהִלַּלְתֶּ֗ם אֶת־ שֵׁ֤ם יְהוָה֙ אֱלֹ֣הֵיכֶ֔ם אֲשֶׁר־ עָשָׂ֥ה עִמָּכֶ֖ם לְהַפְלִ֑יא וְלֹא־ יֵבֹ֥שׁוּ עַמִּ֖י לְעוֹלָֽם׃
	(Mur. 88 2,8) ואכלתם אכול ושבוע] (Mur. 88 2,9) [והללתם את שם יהוה אלהיכ]ם֯[ אשר עשה עמכם להפליא] (Mur. 88 2,10) [ולא יבשו עמי ]לעולם
27	וִידַעְתֶּ֗ם כִּ֣י בְקֶ֤רֶב יִשְׂרָאֵל֙ אָ֔נִי וַאֲנִ֛י יְהוָ֥ה אֱלֹהֵיכֶ֖ם וְאֵ֣ין ע֑וֹד וְלֹא־ יֵבֹ֥שׁוּ עַמִּ֖י לְעוֹלָֽם׃ ס
	(Mur. 88 2,10) ויד֯ע֯תם כי בק[רב ישראל אני ואני] (Mur. 88 2,11) [יהוה אלהיכם וא]ין עו֯[ד] ולא י֯בשו עמ֯[י לעולם ]

3
1	וְהָיָ֣ה אַֽחֲרֵי־ כֵ֗ן אֶשְׁפּ֤וֹךְ אֶת־ רוּחִי֙ עַל־ כָּל־ בָּשָׂ֔ר וְנִבְּא֖וּ בְּנֵיכֶ֣ם וּבְנֽוֹתֵיכֶ֑ם זִקְנֵיכֶם֙ חֲלֹמ֣וֹת יַחֲלֹמ֔וּן בַּח֣וּרֵיכֶ֔ם חֶזְיֹנ֖וֹת יִרְאֽוּ׃
	(Mur. 88 2,13) [והיה אחרי כן א]ש֯פוך את֯ רו֯חי על[ כל בשר ונבאו בניכם] (Mur. 88 2,14) [ובנותיכם זקניכם חלמות יחל]מון [ב]ח֯ו֯ר֯יכם[ חזינות ירא]ו֯
2	וְגַ֥ם עַל־ הָֽעֲבָדִ֖ים וְעַל־ הַשְּׁפָח֑וֹת בַּיָּמִ֣ים הָהֵ֔מָּה אֶשְׁפּ֖וֹךְ אֶת־ רוּחִֽי׃
	(Mur. 88 2,14) וגם ע[ל] (Mur. 88 2,15) [העבדים ועל השפחות בימ]ים ההםה אשפוך֯ את רוח[י
3	וְנָֽתַתִּי֙ מֽוֹפְתִ֔ים בַּשָּׁמַ֖יִם וּבָאָ֑רֶץ דָּ֣ם וָאֵ֔שׁ וְתִֽימֲר֖וֹת עָשָֽׁן׃
	(Mur. 88 2,15) ו]נתתי֯ מו֯פת֯[ים] (Mur. 88 2,16) [בשמים ובארץ דם וא]ש ותי֯מרות ע֯[שן
4	הַשֶּׁ֙מֶשׁ֙ יֵהָפֵ֣ךְ לְחֹ֔שֶׁךְ וְהַיָּרֵ֖חַ לְדָ֑ם לִפְנֵ֗י בּ֚וֹא י֣וֹם יְהוָ֔ה הַגָּד֖וֹל וְהַנּוֹרָֽא׃
	(Mur. 88 2,16) השמש יהפך ]לחשך והירח[ לדם] (Mur. 88 2,17) [לפני בוא יום ]יהוה הגדול ו֯הנו[רא
5	וְהָיָ֗ה כֹּ֧ל אֲשֶׁר־ יִקְרָ֛א בְּשֵׁ֥ם יְהוָ֖ה יִמָּלֵ֑ט כִּ֠י בְּהַר־ צִיּ֨וֹן וּבִירוּשָׁלִַ֜ם תִּֽהְיֶ֣ה פְלֵיטָ֗ה כַּֽאֲשֶׁר֙ אָמַ֣ר יְהוָ֔ה וּבַ֨שְּׂרִידִ֔ים אֲשֶׁ֥ר יְהוָ֖ה קֹרֵֽא׃
	(Mur. 88 2,17) והיה כל אשר ]י֯קרא בשם֯[ יהוה] (Mur. 88 2,18) [ימלט כי בהר צ]י֯ו֯ן ובירושל[ם תה]יה פ֯לי֯טה כ֯אשר אמר יהו[ה] (Mur. 88 2,19) [ובשרי]ד֯ים א[שר יהו]ה קר[א]

4
1	כִּ֗י הִנֵּ֛ה בַּיָּמִ֥ים הָהֵ֖מָּה וּבָעֵ֣ת הַהִ֑יא אֲשֶׁ֥ר אשוב (אָשִׁ֛יב) אֶת־ שְׁב֥וּת יְהוּדָ֖ה וִירוּשָׁלָֽ͏ִם׃
	(Mur. 88 2,19) כי הנה ב֯י֯מים ה֯היא ובעת [ההי]א (Mur. 88 2,20) [אשר א]שוב את שבות יהודה וירושלם֯
2	וְקִבַּצְתִּי֙ אֶת־ כָּל־ הַגּוֹיִ֔ם וְה֣וֹרַדְתִּ֔ים אֶל־ עֵ֖מֶק יְהֽוֹשָׁפָ֑ט וְנִשְׁפַּטְתִּ֨י עִמָּ֜ם שָׁ֗ם עַל־ עַמִּ֨י וְנַחֲלָתִ֤י יִשְׂרָאֵל֙ אֲשֶׁ֣ר פִּזְּר֣וּ בַגּוֹיִ֔ם וְאֶת־ אַרְצִ֖י חִלֵּֽקוּ׃
	(Mur. 88 2,20) [וק]בצתי את כל ה֯[גוי]ם֯ (Mur. 88 2,21) [ו]הורד[תי]ם אל עמק י֯הושפט ונשפטתי [עמ]ם שם על עמי (Mur. 88 2,22) ו֯נ֯חלתי ישראל אשר פזרו בגוים ואת אר[צי ח]לקו
3	וְאֶל־ עַמִּ֖י יַדּ֣וּ גוֹרָ֑ל וַיִּתְּנ֤וּ הַיֶּ֙לֶד֙ בַּזּוֹנָ֔ה וְהַיַּלְדָּ֛ה מָכְר֥וּ בַיַּ֖יִן וַיִּשְׁתּֽוּ׃
	(Mur. 88 2,22) ועל עמי ידו (Mur. 88 2,23) גו֯ר֯ל ו֯יתנו הילד בזונה והילדה מכרו ביין וי[שתו]
4	וְ֠גַם מָה־ אַתֶּ֥ם לִי֙ צֹ֣ר וְצִיד֔וֹן וְכֹ֖ל גְּלִיל֣וֹת פְּלָ֑שֶׁת הַגְּמ֗וּל אַתֶּם֙ מְשַׁלְּמִ֣ים עָלָ֔י וְאִם־ גֹּמְלִ֤ים אַתֶּם֙ עָלַ֔י קַ֣ל מְהֵרָ֔ה אָשִׁ֥יב גְּמֻלְכֶ֖ם בְּרֹאשְׁכֶֽם׃
	(4Q82 frg. 31bR+38-40a,1) [וגם מה אתם לי צר וצידון ו]כ֯ול גלילת פלשת֯[ הגמול אתם משלמים עלי] (4Q82 frg. 31bR+38-40a,2) [ואם גמלים אתם עלי קל מ]ה֯ר אשיב ג֯[מולכם בראשכם (Mur. 88 2,23) וגם מה אתם (Mur. 88 2,24) לי֯ צר וצידון וכל גלילות פלשת הג֯מול אתם מ֯שלמים עלי (Mur. 88 2,25) ואם גמלים [א]תם עלי קל מהרה אשיב גמלכם [בראש]כם
5	אֲשֶׁר־ כַּסְפִּ֥י וּזְהָבִ֖י לְקַחְתֶּ֑ם וּמַֽחֲמַדַּי֙ הַטֹּבִ֔ים הֲבֵאתֶ֖ם לְהֵיכְלֵיכֶֽם׃
	(4Q82 frg. 31bR+38-40a,2) אשר כספי] (4Q82 frg. 31bR+38-40a,3) [וזהבי לקחתם ומחמדי הטבים ]ה֯בא֯[תם להיכליכם (Mur. 88 2,25) אשר (Mur. 88 2,26) כספ֯י֯ ו֯ז֯ה֯ב[י] לקח֯תם ומחמדי הטובים הבאתם להיכלכם
6	וּבְנֵ֤י יְהוּדָה֙ וּבְנֵ֣י יְרוּשָׁלִַ֔ם מְכַרְתֶּ֖ם לִבְנֵ֣י הַיְּוָנִ֑ים לְמַ֥עַן הַרְחִיקָ֖ם מֵעַ֥ל גְּבוּלָֽם׃
	(4Q78 frg. 18-20,1) ובני יהודה ובני י]ר֯ושלים מכרתמה לבנ֯י֯ (4Q82 frg. 31bR+38-40a,3) ובני יהודה ובני] (4Q82 frg. 31bR+38-40a,4) [ירושלים מכרתם לבני היונים למען הרחיקם מעל גבולם] (Mur. 88 2,26) ובני (Mur. 88 2,27) [י]הוד[ה] ו[ב]ני [יר]ושלם מכרתם לבני היונים למע֯ן הרחיקם מעל (Mur. 88 2,28) [גבו]ל[ם
7	הִנְנִ֣י מְעִירָ֔ם מִן־ הַ֨מָּק֔וֹם אֲשֶׁר־ מְכַרְתֶּ֥ם אֹתָ֖ם שָׁ֑מָּה וַהֲשִׁבֹתִ֥י גְמֻלְכֶ֖ם בְּרֹאשְׁכֶֽם׃
	(4Q82 frg. 31bR+38-40a,5) [הנני מעירם מן המקום אשר מכרת]ם֯ אותם שמה [והשבתי גמלכם] (4Q82 frg. 31bR+38-40a,6) [בראשכם (Mur. 88 2,28) הנני מ]עירם מן המקום אשר מכרתם אתם שמה והשבתי (Mur. 88 2,29) [גמלכם בראשכ]ם
8	וּמָכַרְתִּ֞י אֶת־ בְּנֵיכֶ֣ם וְאֶת־ בְּנֽוֹתֵיכֶ֗ם בְּיַד֙ בְּנֵ֣י יְהוּדָ֔ה וּמְכָר֥וּם לִשְׁבָאיִ֖ם אֶל־ גּ֣וֹי רָח֑וֹק כִּ֥י יְהוָ֖ה דִּבֵּֽר׃ ס
	(4Q78 frg. 18-20,2) כי יהוה צב]אות דבר (4Q82 frg. 31bR+38-40a,6) ומכרתי את בניכם וא]ת בנותיכם בי֯ד֯[ בני יהודה ומכרום] (4Q82 frg. 31bR+38-40a,7) [לשבאים אל גוי רחוק כי יהוה דבר (Mur. 88 2,29) ומכרתי את בניכם ואת בנותי֯כם ביד בני (Mur. 88 2,30) [יהוד]ה ומ֯כ֯רום לשבאים אל גוי רחוק כי יה֯[ו]ה דבר
9	קִרְאוּ־ זֹאת֙ בַּגּוֹיִ֔ם קַדְּשׁ֖וּ מִלְחָמָ֑ה הָעִ֙ירוּ֙ הַגִּבּוֹרִ֔ים יִגְּשׁ֣וּ יַֽעֲל֔וּ כֹּ֖ל אַנְשֵׁ֥י הַמִּלְחָמָֽה׃
	(4Q78 frg. 18-20,2) [קראו זואת בג]ו֯יים קדשו מלחמה (4Q78 frg. 18-20,3) [העירו הגבורים יגשו יעלו כל אנשי המלחמה (4Q82 frg. 31bR+38-40a,7) ]קירא[ו זאת בגוים קדשו מלחמה] (4Q82 frg. 31bR+38-40a,8) [העירו הגבורים יגשו יעלו כל אנשי המלחמה (Mur. 88 2,31) ק֯[ר]או זאת ב[גוי]ם ק֯ד֯ש[ו] מלחמה העירו הגבורים (Mur. 88 2,32) [יגשו יעלו ]כ֯ל֯ א֯נשי המלחמה
10	כֹּ֤תּוּ אִתֵּיכֶם֙ לַֽחֲרָב֔וֹת וּמַזְמְרֹֽתֵיכֶ֖ם לִרְמָחִ֑ים הַֽחַלָּ֔שׁ יֹאמַ֖ר גִּבּ֥וֹר אָֽנִי׃
	(4Q78 frg. 18-20,3) כתו אתיכם לחר]בות ומזמרותיכמה (4Q78 frg. 18-20,4) [לרמחים החלש יאמר גבור אני -- ]○○ל֯○○○○○○○○○○ש֯○○○○○○ (4Q82 frg. 31bR+38-40a,8) כתו אתיכם לחרבות ומזמרתיכם] (4Q82 frg. 31bR+38-40a,9) [לרמחים החלש יאמר גבור אני (Mur. 88 2,32) כתו א֯תיכם֯ לחר֯[בו]ת֯ ומזמרתיכם (Mur. 88 2,33) [לרמחים הח]לש י֯א֯מ֯ר֯ גב֯ו֯ר אני
11	ע֣וּשׁוּ וָבֹ֧אוּ כָֽל־ הַגּוֹיִ֛ם מִסָּבִ֖יב וְנִקְבָּ֑צוּ שָׁ֕מָּה הַֽנְחַ֥ת יְהוָ֖ה גִּבּוֹרֶֽיךָ׃
	(4Q82 frg. 31bR+38-40a,9) עושו ובאו כל הגוים מסביב ונקבצו שמה] (4Q82 frg. 31bR+38-40a,10) [הנ]ח֯ת יה֯ו֯[ה גבוריך (Mur. 88 2,33) ע[ו]שו ו[ב]או כל הגוים מסביב (Mur. 88 2,34) [ונקבצו שמ]ה ה֯[נחת] יהוה גבוריך
12	יֵע֙וֹרוּ֙ וְיַעֲל֣וּ הַגּוֹיִ֔ם אֶל־ עֵ֖מֶק יְהֽוֹשָׁפָ֑ט כִּ֣י שָׁ֗ם אֵשֵׁ֛ב לִשְׁפֹּ֥ט אֶת־ כָּל־ הַגּוֹיִ֖ם מִסָּבִֽיב׃
	(4Q78 frg. 18-20,5) יעורו ויעלו ה]ג֯ויים אל[ ]ע֯מק יושפט כי (4Q78 frg. 18-20,6) [שם אשב לשפט את כל הגוים מסביב (4Q82 frg. 31bR+38-40a,10) יעורו ויעלו הגוים אל עמק יהושפט] (4Q82 frg. 31bR+38-40a,11) [כי שם ]אש[ב לשפט את כל הגוים מסביב (Mur. 88 2,34) יעורו ויעל[ו] הגוים א֯ל עמק (Mur. 88 2,35) [יהושפט כי] ש֯ם [אש]ב֯ לשפט את כל הגוים מ֯ס֯ביב
13	שִׁלְח֣וּ מַגָּ֔ל כִּ֥י בָשַׁ֖ל קָצִ֑יר בֹּ֤אֽוּ רְדוּ֙ כִּֽי־ מָ֣לְאָה גַּ֔ת הֵשִׁ֙יקוּ֙ הַיְקָבִ֔ים כִּ֥י רַבָּ֖ה רָעָתָֽם׃
	(4Q78 frg. 18-20,6) שלחו מגל ]כי ב[ש]ל֯ [קצ]י֯ר באו רדו֯ כי (4Q78 frg. 18-20,7) [מלאה גת השיקו היקבים כי רבה רעתם (4Q82 frg. 31bR+38-40a,11) שלחו מגל כי בשל] (4Q82 frg. 31bR+38-40a,12) [קציר ]ב֯א֯ו [רדו כי מלאה גת השיקו היקבים כי רבה רעתם ] (Mur. 88 2,35) שלחו מגל (Mur. 88 2,36) [כי בשל קציר באו ]ר֯ד֯ו֯ כ֯י֯ מלאה֯ גת֯ ה֯שיקו [ה]י֯ק֯בים [כ]י רבה (Mur. 88 2,37) [רעתם
14	הֲמוֹנִ֣ים הֲמוֹנִ֔ים בְּעֵ֖מֶק הֶֽחָר֑וּץ כִּ֤י קָרוֹב֙ י֣וֹם יְהוָ֔ה בְּעֵ֖מֶק הֶחָרֽוּץ׃
	(4Q78 frg. 18-20,7) המונים המונים בע]םק החרוץ כי (4Q78 frg. 18-20,8) [קרוב יום יהוה בעמק החרוץ (4Q82 frg. 31bR+38-40a,13) כי קרוב יום יהוה בעמק החרוץ -- ] (Mur. 88 2,37) המונים המונים ב]ע֯מ֯[ק] ה֯ח֯רוץ כי קרוב י[ו]ם[ יהוה בעמק] (Mur. 88 2,38) [החרוץ
15	שֶׁ֥מֶשׁ וְיָרֵ֖חַ קָדָ֑רוּ וְכוֹכָבִ֖ים אָסְפ֥וּ נָגְהָֽם׃
	(4Q78 frg. 18-20,8) שמש וירח קדרו וכוכבים אספו ]○[ ]נוגהמ (Mur. 88 2,38) שמש וירח ]קד֯ר֯ו ו֯כ֯[ו]כב֯י֯ם א֯ס֯[פו נג]הם
16	וַיהוָ֞ה מִצִּיּ֣וֹן יִשְׁאָ֗ג וּמִירוּשָׁלִַ֙ם֙ יִתֵּ֣ן קוֹל֔וֹ וְרָעֲשׁ֖וּ שָׁמַ֣יִם וָאָ֑רֶץ וַֽיהוָה֙ מַֽחֲסֶ֣ה לְעַמּ֔וֹ וּמָע֖וֹז לִבְנֵ֥י יִשְׂרָאֵֽל׃
	(4Q78 frg. 18-20,9) [ויהוה מציון ישאג ומירושלם יתן קולו ]ו֯ירעשו שמים וארץ ויהוה (4Q78 frg. 18-20,10) [מחסה לעמו ומעוז לבני ישראל (4Q82 frg. 31bR+38-40a,14) ויהוה מציון ישאג ומירושלם יתן קולו] (4Q82 frg. 31bR+38-40a,15) [ורעשו שמים וארץ ויהוה מחסה לעמו ומעוז לבני ישראל ] (Mur. 88 2,38) ויה[וה]
17	וִֽידַעְתֶּ֗ם כִּ֣י אֲנִ֤י יְהוָה֙ אֱלֹ֣הֵיכֶ֔ם שֹׁכֵ֖ן בְּצִיּ֣וֹן הַר־ קָדְשִׁ֑י וְהָיְתָ֤ה יְרוּשָׁלִַ֙ם֙ קֹ֔דֶשׁ וְזָרִ֥ים לֹא־ יַֽעַבְרוּ־ בָ֖הּ עֽוֹד׃ ס
	(4Q78 frg. 18-20,10) וידעתם כי אני ]יהוה אלוהיכמה השוכן (4Q78 frg. 18-20,11) [בציון הר קדשי והיתה ירושלם קדש וזרים לוא יע]ב֯רו [בה עוד (4Q82 frg. 31bR+38-40a,16) [ויד]עת֯[ם כי אני יהוה אלהיכם שכן בציון הר קדשי והיתה ירושלם] (4Q82 frg. 31bR+38-40a,17) [קדש וזרים לא יעברו בה עוד
18	וְהָיָה֩ בַיּ֨וֹם הַה֜וּא יִטְּפ֧וּ הֶהָרִ֣ים עָסִ֗יס וְהַגְּבָעוֹת֙ תֵּלַ֣כְנָה חָלָ֔ב וְכָל־ אֲפִיקֵ֥י יְהוּדָ֖ה יֵ֣לְכוּ מָ֑יִם וּמַעְיָ֗ן מִבֵּ֤ית יְהוָה֙ יֵצֵ֔א וְהִשְׁקָ֖ה אֶת־ נַ֥חַל הַשִּׁטִּֽים׃
	(4Q78 frg. 18-20,11) והיה ביום] (4Q78 frg. 18-20,12) [ההוא ]יטיפו הה֯[רים עסיס והג]בעות תלכנה ח֯[לב וכל אפיקי יהודה ילכו] (4Q78 frg. 18-20,13) [מים] ומעין מבי[ת יהוה יצא והשקה ]את כול נחל השט[ים (4Q82 frg. 31bR+38-40a,17) והיה ביום ההוא יטפו ההרים] (4Q82 frg. 31bR+38-40a,18) [עסיס והגבעות תלכנה חלב וכל אפיקי יהודה ילכו מים ומעין מבית יהוה] (4Q82 frg. 31bR+38-40a,19) [יצא והשקה את נחל השטים
19	מִצְרַ֙יִם֙ לִשְׁמָמָ֣ה תִֽהְיֶ֔ה וֶאֱד֕וֹם לְמִדְבַּ֥ר שְׁמָמָ֖ה תִּֽהְיֶ֑ה מֵֽחֲמַס֙ בְּנֵ֣י יְהוּדָ֔ה אֲשֶׁר־ שָׁפְכ֥וּ דָם־ נָקִ֖יא בְּאַרְצָֽם׃
	(4Q78 frg. 18-20,13) מצרים לשממה תהיה ואדום] (4Q78 frg. 18-20,14) [ל]מדבר ל֯מדבר שממ[ה תהיה מחמס בני י]הודה אשר ש[פכו דם נקיא בארצם ] (4Q82 frg. 31bR+38-40a,19) מצרים לשממה תהיה ואדום למדבר] (4Q82 frg. 31bR+38-40a,20) [שממה תהיה ]מחמס בני י֯[הודה אשר שפכו דם נקיא בארצם ]
20	וִיהוּדָ֖ה לְעוֹלָ֣ם תֵּשֵׁ֑ב וִירוּשָׁלַ֖͏ִם לְד֥וֹר וָדֽוֹר׃
	(4Q82 frg. 31bR+38-40a,21) [ויהודה לעולם ]תשב[ וירושלם לדור ודור ]
21	וְנִקֵּ֖יתִי דָּמָ֣ם לֹֽא־ נִקֵּ֑יתִי וַֽיהוָ֖ה שֹׁכֵ֥ן בְּצִיּֽוֹן׃
	(4Q78 frg. 18-20,15) ונק]י֯תי דמם לו֯[א נקיתי ויהוה שכן בציון ]